“ძალიან იმედგაცრუებული ვარ გაერთიანებული სამეფოს პრემიერ-მინისტრ კირ სტარმერით, რომელმაც, მისი თქმით, მას დიეგო-გარსიას ბაზის ირანზე დარტყმების განსახორციელებლად გამოყენებაში ხელი შეუშალა”,_ ამის შესახებ ამერიკის შეერთებული შტატების პრეზიდენტმა დონალდ ტრამპმა განაცხადა.
The Telegraph-თან ინტერვიუში ტრამპმა განაცხადა, რომ პრემიერ-მინისტრის თავდაპირველი უარი აშშ-ის ძალებს ჩაგოსის კუნძულების ბაზის გამოყენების ნებართვაზე, ორ ქვეყანას შორის არსებული ურთიერთობისთვის უჩვეულო იყო.
დონალდ ტრამპის თქმით, კირ სტარმერს ძალიან დიდი დრო დასჭირდა გადაწყვეტილების შესაცვლელად.
როგორც გამოცემა წერს, დიეგო გარსიას გარშემო არსებულმა დავამ პრეზიდენტი აიძულა, უარი ეთქვა პრემიერ-მინისტრის საკამათო ჩაგოსის შეთანხმების მხარდაჭერაზე, რომელიც ითვალისწინებს ინდოეთის ოკეანეში ამ ტერიტორიის საკუთრების უფლების გადაცემას მავრიკისთვის და მის ნაცვლად სამხედრო ბაზის იჯარის წესით მიღებას.
„უცებ [მავრიკიმ] საკუთრება მოითხოვა. მას უნდა ებრძოლა და ეს ტერიტორია საკუთრებაში მიეღო. ძალიან იმედგაცრუებულები ვიყავით კირით“, – აღნიშნა ტრამპმა.
მისი მტკიცებით, სტარმერი ყოველთვის უნდა დათანხმებოდა აშშ-ს მიერ დიეგო-გარსიას გამოყენებას, რადგან ირანი პასუხისმგებელია მისი ქვეყნიდან უამრავი ადამიანის მკვლელობაზე.
შეგახსენებთ, გაერთიანებულმა სამეფომ, საერთაშორისო სამართალზე დაყრდნობით, უარი განაცხადა, აშშ-სთვის მიეცა ნებართვა, დიეგო-გარსიასა და ფეირფორდის ბაზებიდან დარტყმები განეხორციელებინა. თუმცა, პრემიერ-მინისტრი კვირა ღამით დათმობაზე წავიდა და განაცხადა, რომ აშშ-ს დიეგო-გარსიაზე წვდომის ნებართვას „კონკრეტული და შეზღუდული თავდაცვითი მიზნებისთვის“ მისცემს.
