თურქეთს სრული უფლება აქვს, რუსეთის მიერ საჰაერო სივრცის დარღვევაზე რეაგირება მოახდინოს. როგორც თურქული მედია იტყობინება, ამის შესახებ საქართველოს თავდაცვის მინისტრმა თინა ხიდაშელმა გერმანიაში ვიზიტის ფარგლებში, ჟურნალისტებთან საუბარში განაცხადა.
“დამოუკიდებელი, სუვერენული ქვეყნის საჰაერო სივრცის დარღვევა იგივეა, რაც ტანკებით შესვლა. დიდი განსხვავება არ არსებობს. ყველა ქვეყანას სრული უფლება აქვს, მსგავს დარღვევებზე რეაგირება მოახდინოს”, – განაცხადა ხიდაშელმა.
მისი თქმით, ბოლო თვეების განმავლობაში, მრავალი გაფრთხილების მიუხედავად, რუსეთი განზრახ არღვევდა ნატო-სა და ევროკავშირის წევრი ქვეყნების საჰაერო სივრცეს.
“ვფიქრობ, ეს კარგი გამოცდილება იქნება რუსებისთვის, რომ მსგავსი ქმედებები დაუსჯელი არ დარჩება”, – განაცხადა ხიდაშელმა.
საქართველოს თავდაცვის მინისტრის შეფასებით, თურქეთი სწორი იყო თავის პასუხში საჰაერო შეჭრაზე.
“თურქეთი სერიოზული ქვეყანაა, რომელიც პასუხს გაგებინებს მსგავსი დარღვევებისთვის და სწორედ ამიტომ, თანამედროვე მსოფლიოში ის მნიშვნელოვანი და პატივცემული პარტნიორი და მოთამაშეა”, – აღნიშნა ხიდაშელმა.
მან ასევე მოუწოდა ნატო-ს ქვეყნებს, გააგრძელონ თურქეთის მტკიცე მხარდაჭერა და აღნიშნა, რომ ეს იყო არამხოლოდ თურქეთის, არამედ ნატო-ს საჰაერო სივრცის დარღვევა.
“ნატო-ს წევრმა სახელმწიფოებმა ნათლად უნდა დააფიქსირონ, რომ მსგავს დარღვევებს არ დაუშვებენ”, – განაცხადა ხიდაშელმა.
თავდაცვის მინისტრმა რუსეთი ექსპანსიონისტური პოლიტიკის გატარებაში დაადანაშაულა და ეჭვი გამოთქვა “ისლამური სახელმწიფოსთან” ბრძოლაში საერთაშორისო კოალიციის წარმატებაში, თუ რუსეთი ამ კოალიციაში წამყვან როლს შეასრულებს.
“ვერ შექმნი კოალიციას ისეთ ქვეყანასთან, როგორიცაა რუსეთი, რომელიც ყოველდღიურად არღვევს დამოუკიდებელი ქვეყნების სუვერენიტეტს”, – განაცხადა ხიდაშელმა.
თავდაცვის მინისტრის თქმით, 2008 წლის ომის შემდეგ რუსეთის წინააღმდეგ ძლიერი საერთაშორისო პოზიციის არარსებობამ რუსეთის ხელმძღვანელობა წააქეზა, გაეგრძელებინა აგრესიული პოლიტიკა უკრაინასთან მიმართებაში.
ხიდაშელმა დასავლეთის ქვეყნები გააფრთხილა, “ისლამური სახელმწიფოს” საფრთხის გამო, რუსეთთან ურთიერთობის ნორმალიზებაზე არ წავიდნენ და რუსეთი ყირიმის ანექსიაში დაადანაშაულა.
ხიდაშელის მოსაზრებით, ნატო-ს “ისლამურ სახელმწიფოსთან” ბრძოლაში წამყვანი როლის შესრულება შეუძლია.
“მჯერა, რომ ნატო-ს შეუძლია, გაუმკლავდეს საერთაშორისო ტერორიზმს. თუ ეს ასე არ არის, მაშინ მსოფლიო გაცილებით დიდ სირთულეში ყოფილა, ვიდრე ეს დღეს წარმოგვიდგენია”, – განაცხადა თინა ხიდაშელმა.
