საპარლამენტო უმრავლესობის წევრის, თენგიზ შარმანაშვილის თქმით, „ერთიანი ნაციონალური მოძრაობის“ წევრის, გიორგი ბარამიძის განცხადება აფხაზეთის ომის შესახებ საქართველოსთვის დამაზიანებელია და სამხედრო დანაშაულის დაბრალების საფრთხეს ქმნიდა.
დეპუტატმა ხაზი გაუსვა პროკურატურის პოზიციას, რომლის მიხედვითაც 90-იან წლებში პატიმართა დახვრეტის ფაქტები გამოძიებით არ დადასტურდა.
„მთავარი საფრთხის შემცველი, რაც ბარამიძემ გააკეთა, იყო ის, რომ თქვა — დახვრეტები მიმდინარეობდაო. ეს განცხადება იყო დიდი საფრთხის შემცველი, საქართველოსთვის წაეყენებინათ პრეტენზიები, რომ მასობრივად ხდებოდა სამხედრო დანაშაული, რასაც ყოფილი შს და თავდაცვის მინისტრი აღიარებს.
რომ არა საერთო კონტექსტი, ვიფიქრებდით, რომ ეს წამოცდენა იყო. ოპოზიციის წარმომადგენლებს მაშინ უნდა ეფიქრათ, როცა მათი წევრი საქართველოსთვის ფრიად დამაზიანებელ განცხადებას აკეთებდა. ბარამიძე წარდგება მართლმსაჯულების წინაშე და პასუხს აგებს — მას აქვს უფლება, სასამართლოზე თავი იმართლოს“, — განაცხადა შარმანაშვილმა.
