იუსტიციის მინისტრი საპროტესტო აქციის მონაწილეებს სიმშვიდისკენ მოუწოდებს და აღნიშნავს, რომ დღეს არცერთი უცხოელის სახელზე სასოფლო-სამეურნეო მიწა არ დარეგისტრირებულა.
მისივე თქმით, არსებული ვნებათაღელვა არის ღია კარის მტვრევა.
წულუკიანი აღნიშნავს, რომ დღეს აქციის გამო, ათასობით ადამიანმა ვერ შეძლო დროული მომსახურების მიღება.
„როდესაც საკუთარ აზრს გამოვხატავთ, უნდა გავითვალისწინოთ, რომ თბილისის იუსტიციის სახლში დღიურად მოდის 10 ათასამდე ადამიანი, ზოგს პასპორტი აქვს ასაღები და რამდენიმე საათში ფრენა აქვს, ზოგს ეჩქარება სამშობიაროში მეუღლესთან დაბრუნდეს და დაბადების მოწმობა წაიღოს. ბევრი სხვა ტრანზაქცია ტარდება დღის განმავლობაში. სამწუხაროდ, ასეთ ადამიანებს დღეს საპროტესტო აქციამ ხელი შეუშალა. იმედი მინდა გამოვთქვა, რომ ხვალიდან მომსახურება განახლდება და ჩვენგან დამოუკიდებელი მიზეზების გამო არ იქნება თბილისის იუსტიციის სახლის შესასვლელი ბლოკირებული. დღეს არცერთი უცხოელის სახელზე სასოფლო-სამეურნეო მიწა არ დარეგისტრირებულა. შესაბამისად, ვნებათაღელვა არის უადგილო და არ არის საჭირო ღია კარის მტვრევა. ყველას მინდა მოვუწოდო სიმშვიდისკენ დ სხვა მოქალაქეების პატივისცემისკენ. დიდი იმედი მაქვს, რომ ხვალიდან ეს შესაძლებელი იქნება“,-განაცხადა თეა წულუკიანმა.
