თბილისში „შაბათის მარში“ მიმდინარეობს. აქციის მონაწილეებმა მსვლელობა ავლაბრის მეტროს მიმდებარე ტერიტორიიდან დაიწყეს და მთავრობის კანცელარიისკენ მიემართებიან.
დღევანდელი მარში განსაკუთრებულად ემიგრანტებს ეძღვნება — შეკრებილების თქმით, სამშობლოდან იძულებით წასული საქართველოს მოქალაქეები ქვეყანაში უნდა დაბრუნდნენ.
ეს პირველი მარშია მას შემდეგ, რაც პრეზიდენტმა საპროტესტო აქციებში მონაწილე 9 პოლიტპატიმარი/მსჯავრდებული შეიწყალა. ადგილზე შეკრებილი პატიმრების მშობლები იმედოვნებენ, რომ საპატიმროებს დარჩენილი პირებიც მალე დატოვებენ.
„პირველ რიგში, იმ ბიჭებს, ვინც გაათავისუფლეს, მინდა გულითადად მივულოცო — ყველა ისინი ჩვენი შვილები არიან. ხოლო იმ ბიჭებს, ვინც იქ დარჩნენ, მინდა, რომ მათაც ძალიან მალე მივულოცო თავისუფლება. ჩვენ ყველა ერთი ვართ, ყველა დედისთვის ყველა სინდისის პატიმარი საკუთარი შვილივითაა“, — განაცხადა დაკავებული გიორგი ჩიკვაიძის დედამ, ეკა წერეთელმა ტვ პირველის ინფორმაციით.
