თბილისის მერმა საკუთარ მოადგილეს, მაია ბითაძეს „თბილსერვისჯგუფის“ ხელმძღვანელობასთან ერთად ორი კვირის ვადაში საყოფაცხოვრებო ნარჩენების გატანის გეგმის შემუშავება დაავალა. როგორც კახა კალაძემ დედაქალაქის მთავრობის დღევანდელ სხდომაზე განაცხადა, ნარჩენები ღამის საათებში უნდა გაიტანონ, რომ ქალაქში მოძრაობას ხელი არ შეეშალოს.
„მინდა, მაია ბითაძეს დავავალო თბილსერვისის ხელმძღვანელ ლევან ჯღარკავასთან ერთად, ორი კვირის ვადაში შეიმუშაონ გეგმა ნარჩენების გატანასთან დაკავშირებით, რათა ეს მოხდეს ისეთ საათებში, რომ მოძრაობას ხელი არ შევუშალოთ. ალბათ უფრო ღამის საათებში. ვიცი, რომ ნარჩენების გატანა ხდება დილის, დღის საათებში, რაც გარკვეულ დისკომფორტს ქმნის და შესაბამისად, მოქალაქეების ინფორმირება ან დახმარება თუ დაგვჭირდება, მზაობა არის, რადგან ბევრი წერილი შემოდის ამასთან დაკავშირებით და თანადგომა იქნება“, – განაცხადა კახა კალაძემ.
