მოსკოვის ნავთობგადამამუშავებელი ქარხნის მახლობლად რუსული საჰაერო თავდაცვის სისტემა „პანცირი“ განათავსეს მას შემდეგ, რაც ობიექტზე უკრაინული დრონების რამდენიმე თავდასხმა განხორციელდა.
გამოცემა Defense Express-ის ცნობით, ინტერნეტში გავრცელებულ კადრებში ჩანს საჰაერო თავდაცვის სისტემა „პანცირ-ს1“, რომელიც მოსკოვის სამხრეთ-აღმოსავლეთით, ნავთობგადამამუშავებელი ქარხნის მახლობლად, ესტაკადაზეა განთავსებული.
ეს ნაბიჯი მოჰყვა ობიექტზე უკრაინული დრონების სულ მცირე ორ ბოლო დარტყმას, მათ შორის ერთ-ერთ თავდასხმას, რომელმაც ქარხნის ინფრასტრუქტურას თვალსაჩინო ზიანი მიაყენა.
კადრებში ჩანს მანქანის კაბინის ზემოთ დამონტაჟებული ლითონის დამცავი ბადე/გალია, რაც ტიპური მოდიფიკაციაა საბრძოლო ზონებთან ახლოს მოქმედი რუსული სამხედრო ტექნიკისთვის. Defense Express-ის ვარაუდით, ეს შეიძლება მიუთითებდეს იმაზე, რომ სისტემა უშუალოდ ფრონტის ხაზიდან ან ფრონტისპირა რეგიონებიდან გადაისროლეს.
