„რუსთავი 2-ის“ ჟურნალისტებზე მომხდარი თავდასხმის დროს დაშავებული დავით ერაძე ამ წუთებში სამხარაულის ექსპერტიზის ბიუროში იმყოფება. ექსპერტიზის დასკვნით მიყენებული დაზიანებების სიმძიმე და ხანდაზმულობა უნდა დადგინდეს.
გუშინ ე.წ. ქართული მარშის წევრების მხრიდან ფიზიკური შეურაცხყოფის შემდეგ ჟურნალისტი საავადმყოფოში გადაიყვანეს.
„როგორც მე განმიმარტეს, ექსპერტიზა ტარდება იმისთვის, რომ დაზიანების სიმძიმე და ხანდაზმულობა დადგინდეს, რის შემდეგაც ეს ყველაფერი საგამოძიებო უწყებას გადაეგზავნება, იმ უწყებას, რომელიც მოკვლევას აწარმოებს. რამდენადაც ვიცი, 6 პიროვნებაა დაკავებული, თუმცა მათ შორის არის თუ არა ის პიროვნება, არ ვიცი, მე მათაც ვუთხარი, რომ უბრალოდ ამოცნობასაც ვერ შევძლებ, იქიდან გამომდინარე, რომ ის მომეპარა, როდესაც მე სადღობელაშვილს ვესაუბრებოდი ცოტა მაღალ ტონებში და გვერდიდან ისე, რომ მისკენ არც ვიყავი მოტრიალებული, დამარტყა, მაგ დროს ჩავიკეცე, როცა ავიწიე, არავინ აღარ იდგა ჩემ გვერდზე“,- განაცხადა დავით ერაძემ.
