თაკო ჩარკვიანი: „რუსულ კორუფციულ სივრცეში ფულის შოვნა და ევროპაში სახლები – ეს პოლიტიკური თაღლითბაა!“

თაკო ჩარკვიანი:

charkviani-tako„მეჭიაურები როგორ ბედავენ, რომ სულხან-საბასა და ილიას ევროპული ოცნება ეჭქვეშ დააყენონ?!“

 

 

„…მოვისმინე დეპუტატ მეჭიაურის სამარცხვინო განცხადება,რომელიც არღვევს ოკუპაციის კანონს, რომლის მიხედვითაც, ასეთი განცხადება დასჯადია. ახლა უკვე მოუთმენლად ველოდები ქართული ოცნებისსიას თუ ამ სიაში კვლავ მოხვდებიან მეჭიაურის ტიპის, ოკუპაციის მომხრე ადამიანები, მე პირადად, უკვე ეჭვმიუტანლად მეცოდინება, რა სურს ჩემს მიერ არჩეულ ხელისუფლებას და შესაბამისად ვიმოქმედებ, ვინაიდან ბავშვობიდან მასწავლეს, როგორ უნდა დავიცვა ღირსება!“ – დაწერა რამდენიმე დღის წინ სოციალურ ქსელ „ფესბუქში“ ჩემმა მეგობარმა, სახალხო პოეტ ჯანსუღ ჩარკვიანის ქალიშვილმა, პუბლიცისტმა თაკო ჩარკვიანმა. როცა ვკითხე, ასეთი რადიკალური განცხადება რატომ გააკეთე-მეთქი, მომიგო, ეს რადიკალური განცხადება კი არა, რეალობის ასახვააო. ცხადია, ჩავეძიე, რეალობაში რას გულისხმობდა…

 

თაკო ჩარკვიანი: – ამას წინათ, ერთ-ერთ გადაცემაში მკითხეს, მეჭიაურის განცხადებებს ანტისახელმწიფოებრივად მიიჩნევთო? ანტისახელმწიფოებრივად მე კი არა, კანონი მიიჩნევს – საქართველოში მრავალი წელია, ოკუპაციის კანონი მოქმედებს, რომლის მიხედვითაც, ოკუპანტი ქვეყნის მომხრე განცხადებები მხოლოდ ანტისახელმწიფებრივი კი არა, დასჯადიცაა! ვინ-ვინ და, ვანო, შენ ხომ ყველზე კარგად იცი, რომ ხელისუფლებას ტკბილ სიტყვებს არასოდეს ვეუბნები და მართლა, ობიექტურად რომ არ ვთვლიდე, ამას არ ვიტყოდი, მაგრამ გიორგი კვირიკაშვილის გამოსვლა მომეწონა, რომელიც მეჭაურის წინააღმდეგ წავიდა, მაგრამ იცი, საქმე რაშია? – თუ პრემიერის კარგი განცხადებები საქმით არ გამაგრდა, ანუ „ქართული ოცნების“ სიაში ოკუპანტი ქვეყნის მხარდამჭერები, რომელთაც „შავრაზმელებს“ ვეძახი, ისევ მრავლად აღმოჩნდებიან, მაშინ სიტყვა სიტყვად დარჩება. ერთი წუთით წარმოვიდგინოთ, რომ საკანონმდებლო ორგანოში ოკუპანტის მხარდამჭერები დიდი რაოდენობით შევიდნენ. ამით რუსული სივრცის პარლამენტს მივიღებთ და ეს, პრაქტიკულად, ხავერდოვანი რევოლუცია იქნება!

– მეჭიაური ისეთი გავლენიანია, რომ ასეთ საშიშროებას ხედავ?

– ლაპარაკი მხოლოდ ბატონ მეჭიაურზე კი არა, იგივე ბატონ თოფაძეზეცაა. მათ განცხადებებზე თავმოყვარე საკანონმდებლო ორგანო, მინიმუმ, განგაშს უნდა ტეხდეს, მით უმეტს, პარლამენტის დავმჯდომარე დავით უსუფაშვილმა აღნიშნა, ამ ტიპის განცხადებები საქართველოს ხელს საერთაშორისო არენაზე უშლისო. თქვე  დალოცვილებო, თუ იცით, რომ ეს საქართველოს ხელს უშლის, განგაშს რატომ არ ტეხ? ამბობენ, გუნდურად ვმუშაობთო, მაშასადამე, მეჭიაურის პათოსს იზიარებენ? – მე, როგორც ამომრჩეველს, ამ შეკითხვაზე პასუხი მაინტერსებს.

სხვათა შორის, ხმა „ქართულ ოცნებას“ მივეცი…

– მეჭიაური „ქართული ოცნების“ საპარლამენტო სიაში იყო…

– ვანო, ამას წინათ, არქივს გადავხედე და უბედნიერესი ადამიანი ვარ, რომ ყველა შეხვედრაზე, როცა ყოფილი ხელისუფლების სისასტიკისგან შეწუხებული ადამიანები გვეკითხებოდნენ, გვინდა, ესენი წავიდნენ, მაგრამ რუსეთის მოხმრე მთავრობა ხომ არ მოდისო, ვამბობდი, მგონი, არ მოდის, მაგრამ თუ შევამჩნევ, რომ ასეა, განგაშს პირველი ავტეხ-მეთქი და ჩემს სიტყვას პატიოსნად ვასრულებ. მე, როგორც საზოგადოების ერთ-ერთ რიგით წარმომადგენელს, მეტი არაფერი შემიძლია, გარდა იმისა, რომ ვიყვირო, როცა მეჭიაურის მსგავსი ადამიანები ასეთ განცხადებებს აკეთებენ, ან როცა ე.წ. კაბელების საქმეზე ბრალდება ვერაფერს წარმოადგენს და ადამიანებს მაინც იჭერენ. სააკაშვილის ხელისუფლებას ათი წელი სწორედ ასეთი რაღაცების – 13 წლის გვანცა ყუფარაძის, გირგვლიანისა თუ ბუტა რობაქიძის საქმის გამო ვებრძოდით. დიდი ბედნიერებაა, რომ 2012 წელს, სიტუაცია უსისხლოდ შეიცვალა და იმ უბედურებას, რაც მაშინ ხდებოდა, ბევრი გადაურჩა, მაგრამ იცი, რა გამოვიდა? – ჩვენს მიერ არჩეული ხელისუფლების ბევრი წარმოამდგენელი ძალიან ცუდ ადამიანებს გაურიგდა. ბოროტებასთან გარიგება კი, დიდი ბოროტმოქმედებაა!

– ამ გარგებას რითი ხსნი, თაკო?

– ფულითა და კეთილდღეობით, ანუ ამბობენ, რომ გარკვეული ადამიანებისგან თანხა აიღეს. მაგალითად, ითქვა, უდესიანმა თანხა გადაიხა, რომ ამ ხელისუფლებაში მისთვის სვიღაცას „სახურავი“ გაკეთებინა, მაგრამ როგორც კი ჯანყარაშვილი და ვიღაც „ტიპები“ მოაცილეს, ხომ ნახე, უდესიანს ბრალი წაუყენეს. სხვათა შორის, ირაკლი ჩიქოვანმა ეთერშიც დაადასტურა, რომ ვიღაცებს უდესიანის შეყვანა თბილისის საკრებულოში უნდოდათ. უდესიანი 9 წელი „ზონდერი“ იყო და თვითონაც თქვა, ოფიციალური დაჯგუფება მყავდაო. ამ „ზონდერმა“ ოთხი შვილის მამა, ბესო ხარძიანი  გაანადგურებინა და ბესომ პროკურატურასაც უთხრა, მომკლავსო.

– თაკო, „ოცნებას“ სხვა „ზონდერ-ნაციონალებიც“ დაუმეგობრნდნე, მაგრამ ვინმემ შეიძლება თქვას, რომ უდესიანზე მიზანმიმართულად ლაპარაკობ…

– მიზანმიმართულად კი არ ვლაპარაკობ, არამედ, ყველაფერი ეს ჩემს თვალწინ მოხდა, ანუ ფაქტებით ვლაპარაკობ და ეს ერთი მაგალითია, თორემ ტელევიზორს რომ ჩართავ, საწყალი ადამიანები სულ იმას ამბობენ, რომ მოტყუებულები და სოციალურად განადგურებულები დარჩნენ… შეკითხვები ამ ხელისუფლების დროსაც მიჩნდება და რა გავაკეთო?

– ამაში ცუდი არაფერია, მაგრამ ვიდრე შეკითხვებს ხმამაღლა დასვამდი, ხომ შეგეძლო, ხელისუფლების ცალკეული წარმომადგენლებისთვის, როგორც იტყვიან, ტეტ-ა-ტეტ გეკითხა, რას აკეთებთ და რა ხდებაო?

– ასეც მოვიქეცი და რამდენიმეს პირადად ვკითხე, მაგრამ თავს იქნევდნენ… საერთოდ, ჩვევა მაქვს: ორჯერ რომ გეტყვი და პასუხს ვერ მივღებ, მესამედ პრესით, პუბლიცისტურად უნდა მოგმართო, მეოთხედ კი, – მივხვდები, რომ უბრალოდ, არ გინდა, გაიგო, რას გეკითხები.

დღეს რუსულ სივრცეში დაბრუნებაზე ლაპარაკი სამარცხვინოა და ამაზე მხოლოდ პოლიტიკური თაღლითები ლაპარაკობენ. ვანო, იცი, ეს პოლიტიკური თაღლითობა რატომაა? – მხოლოდ მთელი ქართული კი არა, რუსული პოლიტიკური ელიტაც ევროპაში იცვამს, იხურავს, ჭამს, მკურნალობს, ზამთრობით სრიალებს და ზოგს ანტვერპენსა თუ ნიცაში  სახლიც აქვს, ანუ ფულს რუსულ კორუფციულ სივრცეში აკეთებენ, საქართველოში ევროპაში „ნაგრიალები“ ბრუნდებიან და საკუთარ ხალხს დაბალი ეკონომიკის რუსულ სივრცეს სთავაზობენ.

– პოლიტიკური ელიტა, ანუ როგორც შენ ამბობ, პოლიტიკური თაღლითები ასე რატომ იქცევიან?

– დემოკრატიის პირობებში ბიზნესის კეთება ძნელია, რუსეთის კორუფციულ სივრცეში კი, ფულის შოვნა ადვილია. ნამდვილი დემოკრატიის დროს, ყველაფერს თავი რომ დავანებოთ, საბანკო სისტემა სხვაგვარად მუშაობს – ევროპაში ბანკი მევახშე არაა და ადამიანები სხვაგვარად სუნთქავენ. ესენი ბიზნესს ფულის რუსულ კორუფციულ სივრცეში შოვნას ეძახიან, მაგრამ ეს ბიზნესი კი არა, პოლიტიკური თაღლითობაა!

– ისე, არ ჯობია, საქმე პოლიტიკურ თაღლითობასთან გვქონდეს, ვიდრე – იმასთან, რომ ევროპამ გაგვრყვნას და ქართველობა წაგვართვას?

– ესეც თავსმოხვეული და თითიდან გამოწოვილი პრობლემა მგონია! გვარებს არ დავასახელებ, მაგრამ ამას წინათ, ინტერნეტში რუსული პოლიტიკური ელიტის წევრთა პირადი ცხოვრების ამსახველი ვიდეოები გავრცელდა და იცი, რა მაინტერსებს? – რუსულ სივრცეში მამათმავლობა მამათმავლობა არაა და ევროპაში მამათმავლობა მამათმავლობაა? ეს ხომ ორმაგი სტანდარტია?! თუ რაღაცას გარყვნილებას ეძახი, ის ყველა სივრცეში გარყვნილება უნდა იყოს, მაგრამ საქართველოს რუსეთუმე პოლიტიკოსებისთვის, როგორც ვაკვირდები, გარყვნილი რუსი პოლიტიკოსის აზრები მისაღებია, მაგრამ თუ იგივე ჭორი ევროპელ პოლიტიკოსზე გავრცელდა, მაშინ ეს გარყვნილებაა.

სხვათა შორის, ერთხელ, ერთ-ერთ დასავლელ ელჩს ვკითხე, თქვენს ქვეყანაში შექსპირს ადაპტირებულად ასწავლით-მეთქი? მიპასუხა, არაო. ჰოდა, მეც მინდა, რომ ჩემს ქვეყანაში ადაპტირებული ვაჟა ფშაველა არ ისწავლებოდეს-მეთქი. იმ ხანად ხელისუფლებაში ჯერ კიდევ სააკაშვილი იყო და ელჩს ისიც  ვუთხრი, რომ განათლების სისტემაში, კორუფციის თვალსაზრისით, სიტუაცია გამოსწორდა, მაგრამ განათლების რეფორმაზე შენიშვნები მქონდა. ელჩი დამეთანხმა და დასძინა, ეს რეფორმა ბალტიისპირეთსაც შევთავაზეთ, მაგრამ ყველაფერი უპირობოდ არ მიიღო, თქვენმა კომისიამ კი, რომელიც ქართველებით იყო დაკომპლექტებული, ყველაფერი უპირობოდ მიიღოო. მოკლედ, ეს ამბავი იმიტომ გავიხსენე, რომ ის, რასაც არანომალურად ვთვლით, არ უნდა მივიღოთ, თორემ იგივე ჰომოსექსუალისტების დევნასაც არანომალურად მივიჩნევ! დიახ, „ტაბურეტკიან“ მღვდლებს არანომალურად მივიჩნევ. ჩემთვის, ტრადიციულ ქართულ ოჯახში გაზრდილი თაკო ჩარკვიანისთვის, ადამი და ადამი მისაღები არაა, მაგრამ ეს იმას არ ნიშნავს, რომ მღვდელი საყურიან ბიჭს „ტაბურეტკით“ გამოეკიდოს! ეს ხომ არანორმალურობა და ხელოვნურად ინსპირირებულია!

– ძალადობას გამართლება, ცხადია, არ აქვს, მაგრამ ეროვნული ტრადიციების დამცველები დასავლეთს იმ კუთხითაც აკრიტიკებენ, რომ თითქოს სარწმუნოებას გვართმევს!

– ვერავინ ვერაფერს ვერც წაგართმევს და ვერც თავზე მოგახვევს, თუ შენთან არსებულ, მაგალითად, ისეთ პროვოკატორებს, როგორებიც მეჭიაურები და სხვა ტიპები არიან, ძალით არ მოახვევინებ!

– სხვათა შორის, როცა სარწმუნოების წართმევაზეა ლაპარაკი, სამართლიანობისთვის, ისიც უნდა აღვიშნოთ, რომ საქართველოს მართლმადიდებლურ ეკლესიას ავტოკეფალია თავის დროზე „ერთმორწმუნე“ რუსეთმა წაართვა!

– რა თქმა უნდა, სწორედ ესაა ორმაგი სტანდარტი და არასწორი აზროვნება! ისე, მაინტერსებს, მიქელანჯელო თმით უნდა ეთრიათ, ან ჩაიკოვსკი „ტაბურეტკით“  ჩაექოლათ?

– „ტაბურეტკების პოლიტიკა“ რუსული პროპაგანდა რატომ გგონია?

– აბა, სადაური პროპაგანდაა? დააკვირდი, სწორედ ეს „ტაბურეტკიანები“ ამტკიცებენ, რომ 8 აგვისტოს რუსეთთან ომი პატარა საქართველომ დაიწყო. ორი აზრი არ არსებობს, რომ მიშა პროვოკაციას წამოეგო, მაგრამ განა, საქართველოში ომი 8 აგვისტოს დაიწყო? განა, რუსეთმა აფხაზეთში ის არ გაგვიკეთა, რაც გაგვიკეთა, ან 9 აპრილს რუსთაველზე არ აგვჩეხა? რუსეთს მართლმადიდებლურად და მეზობლურად ჩვენ ვექცევით, თორემ ის ბარბაროსულად გვექცევა!

– შეიძლება, მაგრამ გვინდა თუ არა, რუსეთი ჩვენი „დიდი ძმა“ და ერთმორწმუნე მეზობელია. ქართული სიბრძნე კი გვასწავლის, ავი მეზობლის ჭირიმეო…

– გასაგებია და სწორედ ამიტომ საქართველო რუსეთთან სალაპარაკოდ ყოველთვის მზადაა, მაგრამ რუსეთი გვეუბნება, მაშინ დაგელაპარაკები, თუ არარაობად იქცევიო. პატარა საქართველო რუსეთს ომს ვერ გამოუცხადებს, მაგრამ ადამიანებს სიმართლეს რატომ არ ვეუბნებით?

– და ეს სიმართლე რა არის?

– რა და, – თავდაცვა, რისკენაც ნაბიჯები უნდა გადადგა, თორემ რუსეთს მანქურთის მეტი არავინ ეტყვის, მოდი, ბატონო, და რუსთაველზე კიდევ ამჩეხეო!

– თაკო, ჩათვალე, რომ მეჭიაური ვარ. ჰოდა, კი ბატონო, რუსეთს ჩვენი ტერიტორიები აქვს ოკუპირებული, მაგრამ იმას რატომ აღარ ვამბობთ, რომ დასავლეთი და, უპირველესად, აშშ-ს ჩვენი ცნობიერების ოკუპაციას ახდენს? რა მნიშვნელობა აქვს, მანქურთად რუსეთი გვაქცევს თუ დასავლეთი?

– ეს ყველაზე დიდი შეურაცხყოფაა!

– უფრო კონკრეტულად?

– ამხელ კულტურის ერი ჩვენს თავს როგორ ვკადრებთ, ვთქვათ, რომ ვიღაც ჩვენს ცნობიერებას შეცვლის?!  ილიას უნდა დავესესხო, ჩვენი თავი ხომ ჩვენ უნდა გვეყუდნოდეს?! ეს დამოკიდებულება იმ 70-წლიანი მონური რეჟმის გაგრძელებაა! მამაჩემს ცნობიერებას ვინ შეცვლიდა ან შეცვლის, როცა 70-იან წლებში აქვს დაწერილი: „როდესაც სიტყვას აგიწონიან მოსკოვით, ბერნით, პრღით, სოპოტით, როდესაც დასწერ დიდ ისტორიას, აღნიშნე, რომ მე არ გემხრობოდი!“ მამაჩემი და მისი მეგობრები რუსეთს არც მაშინ ემხრობოდნენ და არც ახლა ემხრობიან, საერთოდ, ნიჭიერი ადამიანის ინტელექტს ვერავინ შეცვლის?!

– ჩემი დაკვირვებით, ისინიც კი, ვინც რუსეთმებად ითვლებიან, არ ამბობენ, გინდა თუ არა, რუსეთს შევუერთდეთო და, უბრალოდ, აცხადებენ, არც რუსეთი გვინდა და არც – დასავლეთი, საქართველო ნეიტრალური ქვეყანა იყოსო…

– სწორედ ესაა რუსული პროპაგანდა!

– დამისაბუთე, რატომ?

– უბედნიერსი ადამიანი ვიქნებოდი, ვეებერთელა კულტურისა და ენის მქონე საქართველოც შვეიცარიასავით რომ იყოს, მაგრამ როგორც კი ნეიტრალიტეტს მოვითხოვთ, რუსეთის პირისპირ მარტო დავრჩებით და ეს ძალიან კარგად იციან!

– რუსეთს ეს, როგორც შენ ამბობ, პაწია საქართველო რისთვის სჭირდება?

– გახსოვს, რუსეთის ერთ-ერთმა მმართველმა შამილს რომ უთხრა, ხედავ, რამხელა სტეპები მაქვსო? შამილმა კი მიუგო, ამხელა სტეპები გაქვს და ორ მთას მედავებიო?! ვიღაცამ შეიძლება, ისიც თქვას, რომ ჩეჩნეთიც არაფერში სჭირდება, მაგრამ ჩვენს მოძმე ერს რუსეთი 21-ე საუკუნეში წყვეტს და მიწასთან ასწორებს.

სხვათა შორის, საქართველოს თავდაცვასთან დაკავშირებით ახლა ძალიან კარგი ნაბიჯები იდგმევა. დასავლეთისა და იგივე ნატო-ს გარდა სხვა ალტერნატივა არ გვაქვს. ხშირად კითხუობენ, ორი რუსეთი არსებობს თუ აროა. კი, რა თქმა უნდა, არსებობს – რუსეთში მეგობრები მყავს, რომელთაც ოლიგარქიული და კორუფციული რუსეთი ყელში აქვთ ამოსული. ამას წინათ, ვიხუმრე, აყვავება ის ხომ არ გგონიათ, 60 რუსი ოლიგარქი ოქროს უნიტაზზე რომ ზის-მეთქი?! რუსეთს მენდელეევის სისტემა და უდიდესი რესურსი აქვს, მაგრამ აბა, ნახონ,  ციმბირსა თუ იგივე მოსკოვთან ახლოს ხალხი როგორ გაჭირვებაში ცხოვრობს. ჩემმა რუსმა მეგობარმა, რომელიც არაჩვეულებრივი დრამატურგია, სოციალურ ქსელში მომწერა, ამ „ხრუშჩოვკებს“ ვერ გავცდითო.

– თაკო, რუსული პროპაგანდა ცალკეული პოლიტიკოსების დამსახურება სულაც არაა და მშიერმუცელა ხალხს ე.წ. რუსული სივრცის მოთხოვნა ეგებ, იმიტომ აქვს, რომ თუნდაც ინგლისურზე უკეთ რუსული ენა იცის?

– ხალხს არასოდეს ვამტყუნებ. საერთოდ, სოციალურ გაჭირვებას ძალიან დიდი მნიშვნელობა აქვს, თან ბოლო დროს ყველა დასავლური ღირებულების მატარებელი ჟურნალისტი თუ პოლიტიკოსი დარტყმის ქვეშ აღმოჩნდა. პირველი ეჭვიც სწორედ ამიტომ გამიჩნდა. მინდა, ეს ეჭვი გამიფანტონ და მეჭიაურები კი არა, ისეთი აზროვნების პოლიტიკოსები ააყვაონ, 21-ე საუკუნეს რომ შეეფერებიან!

– დემოკრატია სიტყვის თავისუფლებაა. ჩვენ კი დემოკრატიულ სახელმწიფოს ვაშენებთ და მეჭაურებს აზრის გამოთქმის უფლებას ვერ წავართმევთ!

– რომელ აზრზეა ლაპარაკი, როცა ჩვენს ქვეყანაში ოკუპაციის კანონი მოქმდებს?!

– ოკუპაციის კანონი მიშას რეჟიმმა მიიღო. „ნაცები“ კი, როგორც იკრვევა, ყველაფერ ცუდს აკეთებდნენ?

– ოთხი წელია, ესენი არიან, მაგრამ ოკუპაციის კანონი არ გაუუქმებიათ, რადგან თვლიან, რომ ამ კანონის არსებობა აუცილებელია. ჩემი ქვეყანა ოკუპირებულია და დიახ, ოკუაციის კანონი უნდა არსებობდეს!

– რა ამის პასუხია, თაკო, და „ნაციონალების“ დროს არჩევნები ყალბდებოდა?

– სააკაშვილისთვის ხმა არასოდეს მიმიცია და 2003 წელს დავწერე კიდეც, რომ ამ ცოტა გაუწონასწორებელი, სასტიკი და ნიჭიერი ადამიანის მეშინოდა. სხვათა შორის, არიან ადამიანები, რომლებიც მასთან ძალიან დიდხანს იყვნენ, დღეს კი, ბევრს ყვირიან! ისე, ცნობისთვის: ეკლესიების დარბევა და შალიკიანები ოქრუაშვილის სახელს უკავშირდება. მოკლედ, მე ხმა არასოდეს მიმიცია, მაგრამ რაღაც ეტაპზე, მიშამ არჩევები კუთვნილი ხმებით მოიგო.

– კი ბატონო, მაგრამ 2003 წლის მერე ბევრი რამ შეიცვლა და თუკი გავყვებით ლოგიკას, რომ არჩევნები ყალბდებოდა, მაშასადამე, რეფერენდუმიც, რომლითაც გადაწყდა, რომ საქართველოს არჩევანი ევროატლანტიკური სივრცეა, ყალბი გამოდის, არა? სხვათა შორს, მეჭიაურები სწორედ ამ ლოგიკას ანვითარებენ…

– ახლანდელი გამოკითხვითაც, ხალხი ევროინტეგრაციის მომხრეა.

– გამოკითხვა სხვა რამეა, რეფერენდუმი – სხვა, თან გამოკითხვას ზოგი არ ენდობა…

– რა ვიცი, მეჭიაურები და თოფაძეები გამოკითხვას იმ ნაწილში ხომ ენდობიან, რომ რუსეთის მომხრე 31 პროცენტია და ესეც ორმაგი სტანდარტია!  საერთოდ, საქართველოს ევროპისკენ სწრაფვა საუკუნეებია მოდის და მეჭიაური როგორ ბედავს, რომ ეჭქვეშ თუნდაც გამსახურდიასდროინდელი რეფერენდუმი დაყენოს? იქნებ, მეჭიარები და თოფაძებიი იმასაც ეჭქვეშ აყენებენ, ზვიად გამსახურდია და მერაბ კოსტავა საქართველოს დამოუკიდებლობას რომ ითხოვდნენ?! სწორედ ამიტომ ვამბობ, რომ ეს შავრაზმული დამოკიდებულებაა, თორემ მიშას სიძულვილმა თვალები არ უნდა დაგვიბრმაოს!

– ახლა გამახსენდა: იყო დრო, როცა თოფაძე მიშასთან მეგობრობდა, მეჭიაური კი, მიშას, თუ არ ვცდები, საგადასახადოში მუშაობდა…

– ეს არ ვიცოდი და ძალიან საინტერესო რამ მითხარი…

მოკლედ, მინდა, დასავლური ორიენტაციის პარლამენტი გყვავდეს და ჩემი ქვეყანა ევროპული ოჯახის ისეთივე სრულფასოვანი წევრი გახდეს, როგორიც, მაგალითად, გერმანია, საფრანგეთი და პოლონეთია. ამის სურვილი საქართველოს ყოველთვის ჰქონდა და მიშას დროს რ გასჩენია. ხალხნო, სულხან-საბასა და ილიას ოცნებას „ნაცმოძრაობას“ ნუ ჩუქნით!

– თაკო, ამ ქვეყანაში, საგარეო კურსის გარდა, სხვა უამრავი პრობლემაა, ავიღოთ, თუნდაც, სოციალური სფერო – ხალხი გაჭირვებულია და ამაზე რატომ არ ლაპარაკობ?

– როგორ არ ვლაპარაკობ, მაგრამ რუსული სივრცისკენ სწრავით, სოციალური პრობლეები ვერ მოგვარდება. წეღან ვთქვი და ახლაც გავიმეორებ, ზოგიერთ პოლიტიკოსს ფულის შოვნა რუსულ კორუფციულ სივრცეში უნდა, „გრიალი“ და ჩაცმა-დახურვა კი – ევროპაში. ხალხი საქართველოდან ევროპაში იმიტომ მიდის, რომ ლტოლვილის დახმარება მიიღოს. ამბობენ, კაპიტალიზმში შევედითო, მაგრამ ის, რაც საქართველოშია, ბატონებო, არც კაპიტალიზმია და არც – არაფერი! ცოტა ხანში თანამედროვე ფეოდალიზმსს მივიღებთ – ვიღაცებს სამსახურიდან ყოველგვარი ახსნა-განმარტების გარეშე უშვებენ და ეს სწორედ ფეოდალური წარმონაქმნია, თორემ დემოკრატულ ქვეყნებში შრომითი უფლებები არსებობს…

– თაკო, „მეოთხე საუკეთსო წელს“ ხომ არ ნანობ, რომ თავის დროზე „ოცნების“ საარჩევნო კამპანიაში აქტიურად მონაწილეობდი?

– არ ვნანობ, რომ ის შეიცვალა, რასაც მახინჯი ფორმა ჰქონდა – „ნაციონალების“ დროს ბევრი გაკეთდა, მაგრამ რაღაცებმა უსასტიკესი და უმახინჯესი ფორმა მიიღო, განსაკუთრებით, ბოლო წლებში და ამიტომ, უნდა შეცვლილიყო. ახლა კი, თუ „ქართული ოცნების“ სია არ მომწეონება, პირდაპირ ვამბობ: ხმას აღარ მივცემ!

– პაატა ბურჭულაძის პოლიტიკური გუნდის მხარდამჭერი ხომ არ გახდები?

– პაატას დიდი ხანია, ვიცნობ, წესიერი, კარგი ადამიანია, ძალიან მიყვარს და მის პოლიტიკაში მოსვლას მივესალმები. ხათუნა ლაგაზიძის დასავლეთისადმი სიმპათიების შესახებაც ვიცი, მაგრამ დღეს იმაზე ლაპარაკი, ვისი მხარდამჭერი ვიქნები, არასწორი და ადრეა, თუმცა პაატა ბურჭულაძის პოლიტიკაში ჩართვას, ნებისმიერ შემთხვევაში, დადებითად ვაფასებ. არ ვიცი, არჩევნებში რას იზამს და ხალხი საჭეს ჩააბარებს თუ არა, მაგრამ ბედნიერი ვიქნები, რომ პოლიტკურ სივრცეში, მაგალითად, გუგული მაღრაძე ხათუნა ლაგაზიძის მსგავსმა ხალხმა ჩაანაცვლოს!

– თაკო, შანსი რომ გქონდეს, მეორედაც საქართველოში დაიბადებოდი?

– ამ ქვეყნის ისეთი გამუსწორებელი ტრფიალი ვარ, რომ მეორედაც საქართველოში დავიბადებოდი! ის, რაც რუსეთმა გაუკეთა, საქართველოსთვის იმ უბედურება შაჰ-აბასსაც არ გაუკეთებია – მეფის გუბერნიად გვაქცია! საბჭოთა რეჟიმმა კი, ერის ნაღები მოხადა, მაგალითად, მამაჩემის დედის ოჯახი მთლიანად ამოწყვიტა. ძალიან ბედნიერი ვარ, რომ გვარში ვაჟკაცები მყავდნენ  და მათი დამოკიდებულება მეც გადმომეცა – მაგალიად, ბებიაჩემთან ბოლშევიკურ რეჟიმზე ვერ დაილაპარაკებოდი.

– ბოლშევიკური რეჟიმი დიდი ხანია, შეიცვალა!

– რას ლაპარალობ! ვიდრე მავზოლეუმში  ლენინი ჰყავთ დასვენებული, რეჟიმი არ შეიცვლება!

– ჰოდა, მეჭიაურ-თოფაძეებს უყვარდეთ ეს მკვდარი ლენინი და იყვნენ, რა პრობლემაა?

– უყვარდეთ, ბატონო, მაგრამ ჩემს სამშობლოს თავი დაანებონ და ფეხებში ჯოხვით ნუ გაედებიან, რომ საქართველომ თავისი გზა ნახოს!

– ისე, მავზოლეუმში ნამყოფი ხარ?

– არა, მამაჩემს მეტი საქმე არ ჰქონდა, მავზოლეუმში ლენინის სანახავად შევეყვანე! ვალოდია ვისოცკი ბუნდოვნად, ბელა ახმადულინა, ევტუშენკო, ვოზნესენსკი, ემილ ლოტიანო და მრავალი სხვა კი, ძალიან კარგად მახსოვს. საერთოდ, მამაჩემს ურთიერთობა ამ ხალხთან ჰქონდა. ის რუსები, რომლებსაც მე ვიცნობ, ძალიან საინტერესო და ბოჰემური ადამიანები არიან. ისე, რუსეთში პასტერნაკიც ცხოვრობდა, მაგრამ დევნიდნენ…

– თაკო, დღეს ცუდი დროებაა?

– ძალიან.

– მერე, არ გეშინია?

– არა. ადამიანო, იმ ოჯახში გავიზარდე, სადაც კაცი 1972 წელს ამბობდა, ტყვია მიზანში მოსახვედრიაო. „ცისკარი“ კი, რკინის „შტივებით“ იმიტომაც დახვრიტეს, რომ ჯანსუღმა რეზო ჯაფარიძის წერილი გამოაქვეყნა და რისი უნდა მეშინოდეს?! მე ჯაბანი კაცის შვილი არ ვარ!

– ჯანსუღი, რომელიც ლომურ თავისუფლებას ეტრფის, როგორ შეიძლება, ჯაბანი იყოს!..

ესაუბრა ვანო პავლიაშვილი

 

banner
წინა სტატიაშიწალენჯიხური დეპრესივ ბლექი ანუ, აბა ულა
შემდეგი სტატიაცოტა ხანში სპორტის სასახლეში ქართული ოცნების ყრილობა დაიწყება