თბილისის საქალაქო სასამართლოს მოსამართლე ირაკლი შვანგირაძის გადაწყვეტილებით, სახელმწიფო უსაფრთხოების სამსახურის უფროსის ყოფილი მოადგილე, ლევან ახობაძე პატიმრობაში რჩება.
დახურულ რეჟიმში გამართულ სხდომაზე მოსამართლემ ახობაძის მიმართ შეფარდებული აღკვეთის ღონისძიება გადასინჯა და ის ძალაში დატოვა. ამასთან, სასამართლომ ბრალდების მხარის მტკიცებულებები დასაშვებად ცნო და საქმე არსებითად განსახილველად გადასცა.
ლევან ახობაძე სუს-ის ანტიკორუფციულმა სააგენტომ განსაკუთრებით დიდი ოდენობით ქრთამის აღების ფაქტზე დააკავა. გამოძიების ინფორმაციით, მან მეწარმეს შუამავლების მეშვეობით თანხის დაბრუნებაში დახმარება აღუთქვა, რის სანაცვლოდაც თავდაპირველად 500 000 ლარი მოითხოვა, თუმცა საბოლოოდ 250 000 ლარის გადაცემაზე შეთანხმდნენ.
ახობაძეს ბრალდება საქართველოს სისხლის სამართლის კოდექსის 338-ე მუხლის მე-3 ნაწილის „ე“ ქვეპუნქტით აქვს წარდგენილი, რაც 11-დან 15 წლამდე ვადით თავისუფლების აღკვეთას ითვალისწინებს.
