სურსათის ეროვნული სააგენტოს ინფორმაციით, აჭარის დეპარტამენტის ინსპექტორებმა გეგმური კონტროლის ფარგლებში დაბა ჩაქვში, თამარ მეფის ქუჩა N34-ში მდებარე ვეტერინარულ აფთიაქში ვადაგასული ვეტერინარული პრეპარატები აღმოაჩინეს.
სააგენტოს ცნობით, ამოღებულია ანტისეპტიკური და ანთების საწინააღმდეგო საშუალება „პიხტის მალამო“, ანტიმიკრობული და სადეზინფექციო საშუალება „იოძეფის ხსნარი“, ასევე ანტიპარაზიტული საინექციო ხსნარი „Prius“.
სურსათის ეროვნული სააგენტოს განცხადებით, ვადაგასული პრეპარატები სააგენტოს ზედამხედველობით განადგურდება.
უწყება აღნიშნავს, რომ ქვეყნის მასშტაბით ვეტერინარული კლინიკებისა და აფთიაქების კონტროლი შინაური ცხოველების ჯანმრთელობის დაცვის მიზნით გრძელდება და ბიზნესოპერატორებს მოუწოდებს, საქმიანობა კანონმდებლობის მოთხოვნების შესაბამისად წარმართონ, დაიცვან პრეპარატების რეალიზაციის ვადები და მათი შენახვის პირობები.
