ნატოს გენერალური მდივანი იენს სტოლტენბერგი უკრაინის დედაქალაქ კიევს მოულოდნელი ვიზიტით ეწვია. ამის შესახებ Nexta Live იუწყება.
სტოლტენბერგი უკვე შეხვდა უკრაინის პრეზიდენტს ვოლოდიმირ ზელენსკის, შემდეგ კი პრესკონფერენცია გამართა.
ნატოს გენერალური მდივნის თქმით, ნატომ სამხედრო კომპანიებთან 2,4 მილიარდი ევროს კონტრაქტები გააფორმა. ამ ფულით უკრაინისთვის ჭურვების და ტყვია-წამლის მიწოდება მოხდება.
სტოლტენბერგმა ასევე აღნიშნა, რომ უკრაინის ძალები კონტრშეტევის პროცესში პოზიციებს ეტაპობრივად იმყარებენ. ის ასევე რუსული ძალების მიერ უკრაინა-რუმინეთის საზღვარზე განხორციელებულ დარტყმებს გამოეხმაურა. სტოლტენბერგმა განაცხადა, რომ რუმინეთში ჩამოვარდნილი რუსული დრონების განზრახ შეტევის მტკიცებულება არ არსებობს. ამასთანავე, ალიანსის გენერალურმა მდივანმა ამ ფაქტს უგუნურობა და დესტაბილიზაციის მცდელობა უწოდა.
