სახელმწიფოს უსაფრთხოების სამსახურის უფროსის ინფორმაციით, სპეცოპერაციის დროს ლიკვიდირებული ადამიანების ვინაობის დადგენაზე მუშაობა ამ დრომდე გრძელდება
“ერთ-ერთი ვიცით და დანარჩენზე ვმუშაობთ ჩვენს კოლეგებთან, ამერიკულ მხარეს ვთხოვეთ და ისინი დანარჩენი პირების დადგენაში გვეხმარებიან”- განაცხადა ვახტანგ გომელაურმა.
მისივე თქმით, სპეცოპერაცია სწორად ჩატარდა და სწორი თანმიმდევრობით დასრულდა. ვერსიებზე საუბრისას, გომელაურმა აღნიშნა, რომ ქართულ მხარეს აშშ-ის გამოძიების ფედერალური ბიურო ეხმარება.
სპეცოპერაცია, რომელიც 20 საათის განმავლობაში მიმდინარეობდა, 22 ნოემბერს საღამოს დასრულდა. სახელმწიფო უსაფრთხოების სამსახურის ინფორმაციით, დაკავებულია 1 ადამიანი, ხოლო სამი მოკლულია. სპეცოპერაციისას დაკავებული პირი საედ დუდაევია.
თბილისში, ბერი გაბრიელ სალოსის ქუჩაზე ანტიტერორისტულ ოპერაციასთან დაკავშირებით, პარლამენტში, ნდობის ჯგუფის შეხვედრაზე სახელმწიფოს უსაფრთხოების სამსახურის უფროს ვახტანგ გომელაურს რამდენიმე საათის განმავლობაში უსმენდნენ.