დედოფლისწყაროს მუნიციპალიტეტის სოფელ ქვემო ქედის მაჟორიტარი დეპუტატი საკრებულოში “ნაციონალური მოძრაობიდან” მერის წარმომადგენელს წინასაარჩევნო კამპანიის ხელშეშლაში ადანაშაულებს.
ავთანდილ ხალხელაური განმარტავს, რომ რწმუნებულის გაღიზიანება ადგილობრივებთან შეხვედრამ და პრობლემების დასახელებამ გამოიწვია, სადაც ქვემო ქედელები სოფელში გაზიფიცირების სამუშაოების არასწორად ჩატარების საკითხს განიხილავდნენ, რამაც წყლის მილების დაზიანება გამოიწვია.
ხალხელაურის თქმით, ავთანდილ ხუმარაშვილმა ის ადგილობრივების წაქეზებაში დაადანაშაულა, სიტყვიერი შერაცხყოფა მიაყენა და ხელი ჰკრა. ოპოზიონერმა დეპუტატმა რაეაგირებისათვის პოლიციას უკვე მიმართა.
სოფლის რწმუნებულის მხრიდან რამე სახის შეურაცხყოფის მიყენებას დედოფლისწყაროს მერი გამორიცხავს. ნიკოლოზ ჯანიაშვილმა კონფლიქტის პროვოცირებაში დეპუტატი დაადანაშაულა და განაცხადა, რომ ინციდენტი ხალხელაურმა დაიწყო.
