აფეთქებას, რომელიც სოხუმის მახლობლად მდებარე ტყის მასივში მოხდა 25 მარტს, ერთი მამაკაცის სიცოცხლე ემსხვერპლა. კონკრეტულად შემთხვევას ადგილი ჰქონდა დილის საათებში ახალი რაიონისა და ქალაქის ნაგავსაყრელთან გამავალი სარკინიგზო გზის სიახლოვეს.
აფხაზური მედია ეყრდნობა სოხუმის დე-ფაქტო რეჟიმის ე. წ. ვიცე-პრემიერის ასლან კობახიას ინფორმაციას, რომლის თანახმად, დაახლოებით 11 საათსა 30 წუთზე ადგილობრივმა მაცხოვრებლებმა აცნობეს მილიციას, რომ „ხეზე ადამიანის ცხედარი იპოვეს, რომლის სხეულის ნაწილები ირგვლივ იყო მიმოფანტული“. შემთხვევის ადგილზე სამართალდამცველებმა დაადგინეს, რომ ადგილი ჰქონდა აფეთქებას და მამაკაცი სწორედ რომ მისი მსხვერპლი გახდა. ცხედარი არ არის იდენტიფიცირებული.