რუსეთის ლიდერი ვლადიმერ პუტინი რუსი ჯარისკაცების მასობრივ მკვლელად იქცა და სრულიად უგულებელყო შეერთებული შტატების სამშვიდობო ძალისხმევა. ამის შესახებ უკრაინის საგარეო საქმეთა მინისტრმა ანდრეი სიბიგამ სოციალურ ქსელ X-ზე დაწერა.
მინისტრმა აღნიშნა, რომ პუტინის ცინიკური განცხადებები შეერთებული შტატების სამშვიდობო ძალისხმევის სრულ უგულებელყოფას აჩვენებს.
„პუტინის ცინიკური განცხადებები აშშ-ის სამშვიდობო ძალისხმევისადმი სრულ ზიზღს აჩვენებს. მიუხედავად იმისა, რომ შეერთებული შტატები და დანარჩენი მსოფლიო მკვლელობების დაუყოვნებლივ შეწყვეტას მოითხოვს, რუსეთის მთავარი სამხედრო დამნაშავე უკრაინის მიწების შემდგომი მიტაცებისა და მეტი უკრაინელის მკვლელობის გეგმებზე საუბრობს“, – განაცხადა სიბიგამ.
ამავდროულად, როგორც საგარეო საქმეთა მინისტრი აღნიშნავს, პუტინის მიერ დღეს გაკეთებული ყველა გიჟური განცხადებიდან გამოირჩევა „ერთი, რუსი ჯარისკაცის ფეხის შესახებ“.
„სინამდვილეში, სადაც რუსი ჯარისკაცი ფეხს დაადგამს, მას თან მხოლოდ სიკვდილი, ნგრევა და განადგურება მოაქვს“, – ხაზგასმით აღნიშნა სიბიგამ.
დიპლომატი აღნიშნავს, რომ პუტინს არ აინტერესებს რუსი ჯარისკაცები, ან უკრაინული დრონების მიერ დაზიანებული მათი ფეხები.
„ის საკუთარი ხალხის მასობრივი მკვლელია. მან უკვე მოკლა მილიონი რუსი ჯარისკაცი უკრაინაში უაზრო სისხლისღვრაში, ყოველგვარი სტრატეგიული მიზნის მიღწევის გარეშე. ერთი მილიონი ჯარისკაცი. ორი მილიონი ფეხი“, – განაცხადა სიბიგამ.
ამავდროულად, უკრაინის საგარეო უწყების ხელმძღვანელის თქმით, „სანამ პუტინი სხვა ქვეყნებში შეჭრისთვის რუსული ჯარების გაგზავნით არის დაკავებული, ის ქვეყანაში მყოფ რუსებს ეკონომიკურად მუხლებზე აყენებს“.
„მისი ცინიკური განცხადებები მხოლოდ ერთ მიზანს ემსახურება: საზოგადოების ყურადღების გადატანას მისი მეოთხედსაუკუნოვანი მმართველობის სრული კრახიდან, რომელმაც რუსეთი შეიყვანა ისეთი განდევნილი რეჟიმების სამარცხვინო კლუბში, როგორიცაა ჩრდილოეთ კორეა და ირანი, საერთაშორისო იზოლაციაში და დაუსრულებელ ეკონომიკურ სტაგნაციაში, რომელიც მხოლოდ გაუარესდება“, – აღნიშნა სიბიგამ.
მისივე თქმით, რუსეთის მშვიდობისკენ იძულების ერთადერთი გზა მისთვის დაუსჯელობის განცდის ჩამორთმევაა.
„უკრაინის თავდაცვის მხარდაჭერის გაზრდა და რუსეთის ეკონომიკისთვის დამანგრეველი სანქციების დაწესება. რუსეთის ტერორისტულ სახელმწიფოდ გამოცხადება. მისი სრული იზოლაცია. მოსკოვის გონს მოყვანა“, – დაწერა სიბიგამ.
ცნობისთვის, კრემლის ლიდერმა ვლადიმერ პუტინმა განაცხადა, რომ რუსებს და უკრაინელებს „ერთ ხალხად“ მიიჩნევს და შესაბამისად, მთელი უკრაინა რუსეთისაა. პუტინმა ასევე განაცხადა, რომ ყველა ტერიტორია, სადაც რუსმა ოკუპანტმა ფეხი დადგა, რუსულია.
