საქართველოს ეკონომიკისა და მდგრადი განვითარების მინისტრმა, მარიამ ქვრივიშვილმა, საქართველოში ვიზიტით მყოფ უზბეკეთის ინვესტიციების, ინდუსტრიისა და ვაჭრობის მინისტრ ლაზიზ კუდრატოვსა და ტრანსპორტის მინისტრ ილხომ მახკამოვს ფოთის საპორტო ინფრასტრუქტურა დაათვალიერებინა. ამის შესახებ ინფორმაციას ეკონომიკისა და მდგრადი განვითარების სამინისტრო ავრცელებს.
ვიზიტის ფარგლებში დელეგაციამ მოინახულა „ეიპიემ ტერმინალსი ფოთი“, „პეის ჯგუფის“ ახალი საზღვაო ნავსადგური და ფოთის თავისუფალი ინდუსტრიული ზონა.
მხარეებმა განიხილეს „შუა დერეფნის“ განვითარების პერსპექტივები. მარიამ ქვრივიშვილმა ხაზი გაუსვა საქართველოს საპორტო ინფრასტრუქტურის მზაობას, ეფექტიანად მოემსახუროს გაზრდილ სატვირთო ნაკადებს. სტუმრები ასევე გაეცნენ ფოთის თავისუფალი ინდუსტრიული ზონის შესაძლებლობებს, რომელიც ქვეყანაში ბიზნესსაქმიანობის მოცულობით ერთ-ერთი მოწინავეა.
