შსს: უცხო ქვეყნის სპეცსამსახურებმა კიბერშეტვით ლუგარიდან ინფორმაცია მოიპოვეს და ატვირთეს

region
ავტ.: region სექტემბერი 3, 2020 15:08

შსს: უცხო ქვეყნის სპეცსამსახურებმა კიბერშეტვით ლუგარიდან ინფორმაცია მოიპოვეს და ატვირთეს

საქართველოს შინაგან საქმეთა სამინისტროს ინფორმაციით, ჯანდაცვის სამინისტროს კომპიუტერულ სისტემაში უნებართვო შეღწევის საქმეზე გამოძიება დაიწყო.

უწყების ცნობით, ამ ეტაპზე მოპოვებული მტკიცებულებების თანახმად, აღნიშნული კიბერშეტევა უცხო ქვეყნის სპეცსამსახურების მიერ განხორციელდა.

გამოძიების ინფორმაცით, კიბერშეტევის მიზანი დაავადებათა კონტროლისა და ლუგარის ლაბორატორიის მონაცემთა ბაზებში დაცული სამედიცინო ხასიათის დოკუმენტაციისა და პანდემიის მართვასთან დაკავშირებული მნიშვნელოვანი ინფორმაციის მართლსაწინააღმდეგო დაუფლება და გამოყენება იყო.

გამოძიება სისხლის სამართლის კოდექსის 284-ე მუხლით მიმდინარეობს, რაც კომპიუტერში უნებართვო შეღწევას გულისხმობს.

“ამ ეტაპზე გამოძიებით დგინდება, რომ 2020 წლის 1 სექტემბერს, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს კომპიუტერულ სისტემაზე ერთ-ერთი უცხო ქვეყნიდან განხორციელდა კიბერშეტევა, რომლის მიზანს წარმოადგენდა სამინისტროს ცენტრალურ აპარატსა და მის სტრუქტურულ ერთეულებში, მათ შორის, დაავადებათა კონტროლისა და საზოგადოებრივი ჯანმრთელობის ეროვნული სააგენტოს რიჩარდ ლუგარის სახელობის საზოგადოებრივი ჯანდაცვის კვლევითი ცენტრის მონაცემთა ბაზებში დაცული სამედიცინო ხასიათის დოკუმენტაციისა და პანდემიის მართვასთან დაკავშირებული მნიშვნელოვანი ინფორმაციის მართლსაწინააღმდეგო დაუფლება და გამოყენება.

კომპიუტერულ სისტემაში უკანონო შეღწევის შედეგად მოპოვებული, ავთენთიკური დოკუმენტაციის ნაწილი ამჟამად ატვირთულია ერთ-ერთ უცხოურ ვებ-გვერდზე და მასობრივი მომხმარებლისთვის ხელმისაწვდომია. ამასთან ერთად, აღნიშნულ ვებგვერდზე ატვირთულია აშკარად ფალსიფიცირებული დოკუმენტები, რომლებიც განზრახ არის გაყალბებული საზოგადოების დაშინების, მათში დაბნეულობისა და უნდობლობის დანერგვის მიზნით”, – აღნიშნავენ უწყებაში.

მათი ცნობით, შინაგან საქმეთა სამინისტრო უახლოეს საათებში მიმართავს პარტნიორი ქვეყნების შესაბამის სამსახურებს, “ამ რთული და სპეციფიკური დანაშაულის სწრაფ და ეფექტურ გამოძიებაში ქმედითი დახმარების აღმოჩენის მიზნით”.

region
ავტ.: region სექტემბერი 3, 2020 15:08