შსს-ს საგანგებო სიტუაციების მართვის სააგენტოს მაშველებმა მტკვარში გადავარდნილი ავტომანქანა და ცხედარი წყლიდან ამოიღეს

შსს-ს საგანგებო სიტუაციების მართვის სააგენტოს მაშველებმა მტკვარში გადავარდნილი ავტომანქანა და ცხედარი წყლიდან ამოიღეს. შსს შესაბამის ვიდეომასალას და ინფორმაციას ავრცელებს.

„შსს-ს საგანგებო სიტუაციების მართვის სააგენტოს მაშველებმა, ინტენსიური სამძებრო სამუშაოების შედეგად, რამდენიმე დღის წინ მტკვარში გადავარდნილი ავტომანქანა და ცხედარი იპოვეს და წყლიდან ამოიღეს.

შემთხვევა 17 მაისს, გამთენიისას, თბილისში, მტკვრის მარჯვენა სანაპიროზე მოხდა. შსს-ს საგანგებო სიტუაციების მართვის სააგენტოს მაშველებმა სამძებრო-სამაშველო ოპერაცია ოპერატიულად – შემთხვევიდან რამდენიმე წუთში დაიწყეს.

მდინარე მტკვრის ძლიერი დინებისა და რთული რელიეფური პირობების მიუხედავად, მაშველებმა, თბილისში, იუსტიციის სახლის მიმდებარე ტერიტორიაზე, დაკარგული “ოპელის” მარკის ავტომობილისა და მისი მძღოლის ცხედარს მიაკვლიეს და წყლიდან ამოღება შეძლეს.

შსს-ს საპატრულო პოლიციის დეპარტამენტის საგზაო-სატრანსპორტო შემთხვევათა საგამოძიებო სამსახური გამოძიებას საქართველოს სსკ-ს 276-ე მუხლის მე-5 ნაწილით აწარმოებს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია“, – აცხადებენ შსს-ში.

შს სამინისტროში გარდაცვლილის ვინაობის შესახებ ამ ეტაპზე, არაფერს ამბობენ. თუმცა, ცნობილია, რომ ნაპოვნი ავტომანქანა სამების საკათედრო ტაძრის მღვდელმონაზონ მამა ბასილის (კორტავას) ეკუთვნოდა და ავტომობილში სწორედ მისი ცხედარია ნაპოვნი.

banner
წინა სტატიაშითენგიზ არჩვაძე: “მოიფიქრონ რამე მთავრობაში, რისთვის სხედან იქ?!”
შემდეგი სტატიავარშავაში უკრაინის ევროინტერგაციის მხარდამჭერი აქცია გაიმართა