“შინაგან საქმეთა სამინისტროს თანამშრომლების მიერ, მოქალაქე რ.შ.-ს მიმართ დაწყებულია გამოძიება ნარკოტიკული საშუალების უკანონო შეძენა-შენახვის ფაქტთან დაკავშირებით.
იგი არაერთხელ იქნა დაბარებული ცენტრალური კრიმინალური პოლიციის დეპარტამენტში, მის მიმართ ადმინისტრაციულ სამართალდარღვევათა კოდექსის 45-ე მუხლის მე-2 ნაწილით ოქმის შედგენის მიზნით, თუმცა იგი თავს არიდებს საგამოძიებო ორგანოში გამოცხადებას,”- აღნიშნულის შესახებ შინაგან საქმეთა სამინისტრომ Rustavi 2-თან გაკეთებულ ოფიციალურ კომენტარში განაცხადა.
ინფორმაციისთვის, დღეს მედიაში გავრცელდა ინფორმაცია, რომლის თანახმადაც, 37 წლის მამაკაცი, როშვან შახვერდოვი, კრიმინალურ პოლიციას ზეწოლაში ადანაშაულებს.
“პირდაპირ მეუბნება, რომ თუ არ გადაიღებ ვინ ყიდის წამალს სოფელშიო, მანქანაში ჩაგიდებ 20 გრამ წამალს და დაგიჭერო”,_ აცხადებს შახვერდოვი.
