სურსათის ეროვნული სააგენტოს ინფორმაციით, შიდა ქართლის დეპარტამენტის ინსპექტორებმა გორში, სოფელ პატარა გარეჯვარში არარეგისტრირებული სასაკლაო გამოავლინეს.
იგი სავალდებულო აღიარებისა და ეკონომიკურ საქმიანობათა რეესტრში რეგისტრაციის გარეშე საქმიანობდა.
შემოწმების შედეგად ობიექტზე კრიტიკული შეუსაბამობები დაფიქსირდა. შესაბამისად, ბიზნესოპერატორს საწარმოო პროცესი რეგისტრაციამდე და დარღვევების სრულად გამოსწორებამდე შეუჩერდა. ხოლო ინდივიდუალური მეწარმე კანონმდებლობის შესაბამისად, დაჯარიმდა.
სურსათის ეროვნული სააგენტო აცხადებს, რომ არალეგალური საწარმოებისა და სასაკლაოების გამოვლენა ქვეყნის მასშტაბით გაგრძელდება და ბიზნესოპერატორებს მოუწოდებს, საქმიანობა შესაბამისი აღიარების გარეშე არ განახორციელონ.
