სტუდენტებს, რომლებსაც სტატუსი შეჩერებული აქვთ ისეთ საგანმანათლებლო პროგრამაზე, რომელზეც უნივერსიტეტს რეფორმის ფარგლებში მიღება შეზღუდული აქვს და ამ მიზეზით სტატუსის აღდგენაზე უარს ეუბნება, 2026-2027 სასწავლო წელს მობილობის უფლება ეძლევათ.
განათლების მართვის საინფორმაციო სისტემის (EMIS) ცნობით, მათ სწავლის გაგრძელება სხვა უმაღლეს საგანმანათლებლო დაწესებულებაში შეეძლებათ, მიუხედავად სწავლის პერიოდის ხანგრძლივობისა.
მობილობის უფლებით სარგებლობისთვის სტუდენტმა განცხადებით EMIS-ს უნდა მიმართოს, რომელიც უზრუნველყოფს პროცესში მის მონაწილეობას.
2026-2027 სასწავლო წლის შემოდგომის სემესტრის მობილობის პორტალზე რეგისტრაცია 24 აგვისტოდან დაიწყება და 8 სექტემბრის 18:00 საათამდე გაგრძელდება.
დამატებითი კითხვებისთვის შეგიძლიათ დაუკავშირდეთ ცხელ ხაზს — (+995 32) 2 200 220 ან მისწეროთ ელ-ფოსტაზე: info@emis.ge.
