სურსათის ეროვნულმა სააგენტომ, მონიტორინგის სახელმწიფო პროგრამის ფარგლებში, სურსათში სუდანის ჯგუფის აზო-საღებავების გამოვლენის მიზნით ქვეყნის მასშტაბით 50 ნიმუში აიღო. ლევან სამხარაულის სახელობის სასამართლო ექსპერტიზის ეროვნულ ბიუროში ჩატარებული ლაბორატორიული კვლევის შედეგად, აკრძალული ნივთიერებები მხოლოდ ერთ შემთხვევაში დაფიქსირდა.
აკრძალული საღებავები — Sudan I და Sudan IV აღმოჩნდა შპს „ნთკ 2016“-ის მიერ წარმოებულ სვანურ მარილში (მისამართი: ქობულეთის რაიონი, სოფელი ქვედა კვირიკე; დამზადების თარიღი: 02.02.2026, ვარგისიანობის ვადა: 02.02.2027).
გამოვლენილ დარღვევასთან დაკავშირებით, ბიზნესოპერატორს აეკრძალა აღნიშნული სვანური მარილის რეალიზაცია; სეს-ის ზედამხედველობით დაიწყო პროდუქციის ბაზრიდან ამოღება და გამოთხოვა.
სააგენტო მოუწოდებს მომხმარებლებს, არ გამოიყენონ აღნიშნული სურსათი, თუ ის უკვე შეძენილი აქვთ.
ცნობისთვის, „სუდანის“ ჯგუფის საღებავები მიეკუთვნება ხელოვნურ აზო-საღებავებს, ბუნებრივად არ გვხვდება სურსათში და არ წარმოადგენს ნებადართულ საკვებდანამატს. სეს-ის ინფორმაციით, რისკზე დაფუძნებული კონტროლის ფარგლებში, 2026 წელს დაგეგმილია სხვადასხვა კატეგორიის სურსათის კიდევ 177 ნიმუშის ლაბორატორიული შემოწმება.
