რუსეთის საგარეო საქმეთა სამინისტროს განცხადება არის მორიგი სამწუხარო დემონსტრირება იმისა, როგორ დასუსტდა ქართული მხარე ბოლო წლების განმავლობაში, – ამის შესახებ „ევროპული საქართველოს“ წარმომადგენელმა, დეპუტატმა, სერგი კაპანაძემ განაცხადა რუსეთის საგარეო საქმეთა სამინისტროს გუშინდელ განცხადებასთან დაკავშირებით.
მისი თქმით, რუსეთის საგარეო საქმეთა სამინისტრო იმდენად გათავხედდა, რომ საქართველოს და მის პარტნიორებს ადანაშაულებს.
„რუსეთის საგარეო უკვე ისეთ შემტევ განცხადებებს აკეთებს, რომ პირიქით, ჩვენ აქეთ გვადანაშაულებს ჩვენი მოქალაქეების გატაცებაში საოკუპაციო ძალების მიერ, ჩვენი მოქალაქეების დაჭრაში ჩვენ გვადანაშაულებს. ისე გათავხედდნენ, რომ გვადანაშაულებენ ჩვენ და ჩვენს პარტნიორებს. ამ განცხადებაში პირდაპირ ჩრდილი მიაყენა ამერიკის შეერთებული შტატების მონაწილეობას ჟენევის მოლაპარაკებებში. იქვე იმედს გამოთქვამენ, რომ კარასინი და აბაშიძე მოაგვარებენ ამ საკითხს, ანუ რომ წარმოვიდგინოთ პირდაპირი გამოვლინებაა, შედეგი, დემონსტრაცია, როგორ დასუსტდა საქართველოს საგარეო პოლიტიკა ივანიშვილის ხელში. მიზანს, რომლის დეკლარირება მოახდინა თავის დროზე, რომ გაქრებოდა რადარებიდან, ზუსტად მიაღწია“, – განაცხადა კაპანაძემ და აღნიშნა, რომ რუსეთის საგარეო უწყების განცხადებაში ყველაფერი ჩანს.
