26 მაისს ოპოზიცია ქუჩაში ხალხის მასშტაბურ გამოსვლას გეგმავს. „კოალიცია ცვლილებისთვის“ ერთ-ერთი ლიდერი, ზურაბ გირჩი ჯაფარიძე „პალიტრანიუსის“ ეთერში აცხადებს, რომ აქცია 19:00 საათზე თსუ-სთან დაიწყება და პარლამენტისკენ დაიძვრება. მისი თქმით, ამჯერად აქციაზე სრულიად ახალი პროცესი და ჩართულობა იგეგმება.
„მსვლელობა იქნება პარლამენტამდე, სადაც სცენა დაგვხვდება. ქორეოგრაფია იქნება თუ სხვა რამ, ჯერ კიდევ ვმსჯელობთ, მაგრამ გვინდა, რომ რაღაც ახალი ამბავი იყოს და ხალხი, ვინც იქ მოვა, რაღაც საქმეში ჩავრთოთ. გვინდა, ეს პროცესი წავიყვანოთ მოქალაქეების მეტი ჩართულობისკენ. სხვანაირად როგორ შეიძლება მეტი ადამიანი გამოიყვანო — ამ ადამიანებს უნდა მისცე საშუალება, რაღაც ტიპის გადაწყვეტილებები თავად მიიღონ“, — აცხადებს ჯაფარიძე.
მისივე თქმით, რუსთაველზე ხალხმრავლობის ჩვენება უმნიშვნელოვანესია, რათა რეჟიმის პროპაგანდა დაიმსხვრეს, თითქოს ხელისუფლება უმრავლესობაშია. „ეს პროტესტი რეჟიმისთვის იმის ჩვენებაა, რომ მიუხედავად ყველაფრისა, მაინც ვიბრძვით. ეს სიგნალია ციხეში მყოფი ადამიანებისთვის და ჩვენი დასავლელი პარტნიორებისთვისაც“, — აღნიშნა პოლიტიკოსმა.
