„პატრიოტთა ალიანსის“ ლიდერი ირმა ინაშვილი რუსთავის მე-6 პენიტენციურ დაწესებულებაში მომხდარი სავარაუდო ძალადობისა და გაუპატიურების საქმეზე დაწესებულების ხელმძღვანელი პირების პასუხისმგებლობის საკითხის დაყენების აუცილებლობაზე საუბრობს.
ინაშვილის განცხადებით, პატიმრები წლების განმავლობაში საუბრობენ დაწესებულების დირექტორის, შოთა ტრაპაიძის, მხრიდან სავარაუდო ძალადობისა და არასათანადო მოპყრობის შესახებ. პოლიტიკოსის თქმით, მსგავსი ბრალდებები სათანადო გამოძიების გარეშე არ უნდა დარჩეს.
ინაშვილი ასევე ახსენებს პატიმრის მიერ დასახელებულ ბადრაგ გიორგი კვარაცხელიას და ამბობს, რომ მისი ინფორმაციით, შესაძლოა, ის წარსულში პენიტენციურ დაწესებულებაში მომხდარი ინციდენტის ამსახველ კადრებშიც ფიგურირებდეს. თავად ინაშვილი აღნიშნავს, რომ ამ ინფორმაციის დადასტურება შესაბამისი უწყებების კომპეტენციაა.
საქმე ეხება 36 წლის პატიმარ გიორგი დავითაძის განცხადებებსაც. მისი თქმით, რუსთავის მე-6 პენიტენციურ დაწესებულებაში, მათ შორის სამარტოო საკანში, მასზე სექსუალური ძალადობა განხორციელდა. დავითაძე ამტკიცებს, რომ ძალადობაში რამდენიმე ბადრაგი მონაწილეობდა და საქმეში დაახლოებით ათამდე პირი ფიგურირებს.
პატიმრის განცხადებით, აღნიშნული პირებიდან ამ დრომდე არცერთი არ არის პასუხისგებაში მიცემული. დავითაძე ასევე საუბრობს დეესკალაციის ოთახში მისი გადაყვანის ორ ეპიზოდზე და აცხადებს, რომ ძალადობის შემდეგ სუიციდის მცდელობაც ჰქონდა.
მისივე თქმით, სავარაუდო დანაშაულის ამსახველი ვიდეოჩანაწერები არსებობს.
აღნიშნულ ბრალდებებს საბოლოო სამართლებრივი შეფასება შესაბამისმა საგამოძიებო ორგანოებმა და სასამართლომ უნდა მისცენ. ამ ეტაპზე მნიშვნელოვანია, დადგინდეს ფაქტობრივი გარემოებები, მათ შორის, არსებობდა თუ არა ძალადობის ფაქტი, ვინ მონაწილეობდა მასში და რა პასუხისმგებლობა შეიძლება დაეკისროს შესაბამის პირებს.
