სასწრაფო-გადაუდებელი სამედიცინო დახმარების მომსახურებისთვის ახალი სტანდარტები განისაზღვრა.
წალენჯიხის მუნიციპალ
იტეტმა ორი სასწრაფო დახმარების მანქანა მიიღო
ცვლილების შეეხება, როგორც სამედიცინო პერსონალის კვალიფიკაციას, ისე ბრიგადების აღჭურვილობასა და ინფრასტრუქტურას. სიახლის მიზანია პაციენტის უსაფრთხოების მაქსიმალური უზრუნველყოფა, ასევე მომსახურების ხარისხის გაზრდა და საერთაშორისო სტანდარტებთან დაახლოება.
ცვლილებების მიხედვით, სასწრაფო სამედიცინო და რეანიმობილის ბრიგადებისთვის სპეციალიზაციის მიხედვით, აუცილებელი აღჭურვილობების კომპლექტაცია განისაზღვრა. ცვლილებები, ასევე შეეხება სასწრაფო გადაუდებელი დახმარების ბრიგადის სამედიცინო პერსონალის უწყვეტ პროფესიულ განათლებას. პროფესიული განვითარების მოთხოვნები განისაზღვრა ექიმების, უმცროსი ექიმების, პარამედიკოსებისა და ექთნებისათვის – მათ, ყოველწლიურად უწყვეტი პროფესიული განვითარების მიზნით, მომზადება-გადამზადების კურსები უნდა გაიარონ.
ცვლილების მიხედვით, 2024 წლიდან სასწრაფო გადაუდებელი სამედიცინო მომსახურების მისაწოდებლად, ავტოსატრანსპორტო საშუალების გამოშვებიდან, არ უნდა იყოს გასული 12 წელზე მეტი. 2025 წლიდან, მისი გამოშვებიდან, 10 წელზე მეტი, რეზერვში მყოფი ავტოსატრანსპორტო საშუალებებისთვის კი 12 წელზე მეტი.
სტანდარტები შეეხება ავტომობილების ტექნიკურ გამართულობასაც. სასწრაფო გადაუდებელი დახმარების ლიცენზიის მისაღებად, ახალი ოპერატორის ყველა სატრანსპორტო საშუალებას, ტექნიკური დათვალიერება, ბოლო ერთი თვის განმავლობაში უნდა ჰქონდეს გავლილი. ამასთან, 2024 წლიდან ბაზარზე, სერვისის ახალი მიმწოდებლის ავტომობილების გამოშვების წელი, არ უნდა აღემატებოდეს 5 წელს, 2025 წლის 1-ელი იანვრიდან კი 3 წელს.
საგანგებო სიტუაციების კოორდინაციისა და გადაუდებელი დახმარების ცენტრი, სასწრაფო სამედიცინო დახმარების სერვისს, მთელი ქვეყნის მასშტაბით, შეუფერხებლად აწვდის. შესაბამისად, გავრცელებული ინფორმაცია, თითქოს, რეგიონებში მცხოვრები მოსახლეობა ვერ იღებს დროულ სასწრაფო სამედიცინო მომსახურებას, სიმართლეს არ შეესაბამება და ცენტრის მიზანმიმართულ დისკრედიტაციას ემსახურება.
დღეს, ქვეყნის მასშტაბით, 319 სასწრაფო და 22 რეფერალური დახმარების ბრიგადა (რეანიმობილი) მუშაობს. ყველა რეგიონშია განთავსებული სასწრაფო სამედიცინო დახმარების ავტომობილები.
2022 წლიდან დღემდე, გადაუდებელი დახმარების ცენტრს 5 რეანიმობილი დაემატა: თბილისში (პედიატრიული), ხულოს, ოზურგეთის, ლენტეხის და ყაზბეგის მუნიციპალიტეტებში. ცენტრი, მოზრდილთა რეანიმობილების განთავსებას ლაგოდეხის, მესტიის, ტყიბულის და სენაკის მუნიციპალიტეტებში, ხოლო პედიატრიული კონტინგენტისთვის თბილისში, ბათუმსა და ქუთაისში გეგმავს.
ჯანდაცვის სამინისტრომ 2023 წლის ივლისში, ახალი, ევროსტანდარტების შესაბამისი, 120 ერთეული სასწრაფო დახმარების მანქანა, მათ შორის, 15 ერთეული რეანიმობილი შეიძინა, რომელთა გადაცემაც გადაუდებელი დახმარების ცენტრისთვის უახლოეს მომავალში დაიწყება.
უკვე განხორციელებულ ცვლილებებსა და დაგეგმილ სიახლეებთან ერთად, სასწრაფო გადაუდებელი სამედიცინო მომსახურების ახალი სტანდარტები, თითოეული პაციენტისთვის, კიდევ უფრო მეტად მაღალი ხარისხისა და საერთაშორისო სტანდარტის სერვისის მიწოდებას ისახავს მიზნად.
