რუსეთსა და ოკუპირებულ აფხაზეთს შორის ე.წ. თავისუფალი ვაჭრობის რეჟიმი ამოქმედდა, – ინფორმაციას აფხაზური მედია დე ფაქტო ვიცე-პრემიერ შამილ აძინბაზე დაყრდნობით ავრცელებს. ახალი რეჟიმის მიხედვით, ტვირთებზე საბაჟო გადასახადები გაუქმდება.
თავისუფალი ვაჭრობის რეჟიმის ამოქმედებას რუსეთის პირველ პირსა და აფხაზეთის დე ფაქტო ხელისუფლებას შორის 2014 წლის 24 ნოემბერს სოჭში გაფორმებული მოკავშირეობის ე.წ. შეთანხმება ითვალისწინებს.
ოფიციალური თბილისი დოკუმენტს ანექსიისკენ გადადგმულ ნაბიჯად აფასებს და მოსალოდნელ საფრთხეებზე საერთაშორისო საზოგადოების ინფორმირებას განაგრძობს. თუმცა, ხელისუფლების ოპონენტების აზრით, მთავრობა საერთაშორისო მექანიზმებს სათანადოდ არ იყენებს.
