საქართველოში მობილურებისა და კომპიუტერების გამოყენების მაჩვენებელი გაიზარდა — საქსტატის კვლევა

საქართველოს სტატისტიკის ეროვნული სამსახურის (საქსტატი) საინფორმაციო და საკომუნიკაციო ტექნოლოგიების გამოყენების უახლესი კვლევის თანახმად, საქართველოში 6 წლის და უფროსი ასაკის მოსახლეობის 93.3% მობილურ ტელეფონს ფლობს, რაც წინა წელთან შედარებით 0.7 პროცენტული პუნქტით გაზრდილი მაჩვენებელია.

მობილური ტელეფონის მფლობელთა წილი გაიზარდა როგორც ქალაქად (0.4 პროცენტული პუნქტით — 95.2%-მდე), ისე სოფლად (1.1 პროცენტული პუნქტით — 90.1%-მდე).

მობილურ ტელეფონებს ყველაზე აქტიურად 15-იდან 59 წლამდე ასაკის მოსახლეობა ფლობს, თუმცა მაღალია მაჩვენებელი უფროს თაობაშიც:

15–29 წელი და 30–59 წელი: 99.1%

60 წლის და უფროსი ასაკი: 90.8%

6–14 წელი: 71.2%

კვლევის მიხედვით, ქვეყანაში კომპიუტერით უზრუნველყოფილია ოჯახების 57.9%. საქალაქო დასახლებებში ეს მაჩვენებელი 69.0%-ს შეადგენს, ხოლო სასოფლო დასახლებებში თითქმის 26%-ით ნაკლებია და 42.8%-ს უტოლდება.

კომპიუტერით უზრუნველყოფა რეგიონების მიხედვით:

თბილისი: 74.1%

აჭარის ა.რ.: 62.1%

სამცხე-ჯავახეთი: 56.9%

ქვემო ქართლი: 52.8%

მცხეთა-მთიანეთი: 52.4%

იმერეთი: 51.0%

შიდა ქართლი: 50.7%

კახეთი: 46.9%

სამეგრელო-ზემო სვანეთი: 46.8%

გურია: 37.4%

რაჭა-ლეჩხუმი და ქვემო სვანეთი: 30.1%

ბოლო 3 თვის განმავლობაში 6 წლის და უფროსი ასაკის მოსახლეობის 49.9%-მა ისარგებლა კომპიუტერით. საქსტატის მონაცემებით, ყველაზე აქტიური მომხმარებლები ბავშვები და ახალგაზრდები არიან:

6–14 წლის ასაკობრივ ჯგუფში კომპიუტერი ბოლო 3 თვეში 89.3%-მა გამოიყენა;

15–29 წლისებში — 79.7%-მა;

30–59 წლის მოსახლეობაში — 47.0%-მა;

60 წლის და უფროს ასაკში ეს მაჩვენებელი 22.3%-მდე მცირდება.