საქართველოში ახალ კორონავირუსის ტესტირებაზე გეოგრაფიული ხელმისაწვდომობა გაიზრდება

თაიმერი timer.ge
ავტ.: თაიმერი timer.ge მარტი 20, 2020 15:58

საქართველოში ახალ კორონავირუსის ტესტირებაზე გეოგრაფიული ხელმისაწვდომობა გაიზრდება

საქართველოში ახალ კორონავირუსის ტესტირებაზე გეოგრაფიული ხელმისაწვდომობა გაიზრდება. ამის შესახებ დაავადებათა კონტროლის ცენტრის ხელმძღვანელმა, ამირან გამყრელიძემ განაცხადა მთავრობის ადმინისტრაციაში, სადაც პრემიერ-მინისტრისა და ჯანდაცვის ექსპერტების შეხვედრა შედგა.

მისი თქმით, შეხვედრაზე სხვა საკითხებთან ერთად ახალ კორონავირუსზე ტესტირების თემაზე იმსჯელეს, კონკრეტულად ვის უნდა ჩაუტარდეს ტესტირება და როგორ.

„დღეს უკვე ქვეყანაში გამოკვლეულია 1 126 ნიმუში. ჩვენ თავიდან ტესტირება დავიწყეთ თებერვლის დასაწყისში, ლუგარის ცენტრში, შემდეგ, ბოლო ორი კვირაა, მოვახდინეთ მისი დეცენტრალიზება და დღევანდელი რიცხვით ტესტირებას აწარმოებს დაავადებათა კონტროლის ცენტრის ქუთაისისა და ბათუმის დეპარტამენტები, ასევე ცენტრალური ინფექციური საავადმყოფო და შევთანხმდით ექსპერტებთან ერთად, რომ მოხდეს უფრო მეტად განვრცობა, გეოგრაფიული ხელმისაწვდომობა ტესტირებაზე და რომ ტესტირების საშუალება, იქნება ეს სწრაფი, თუ „ოქროს სტანდარტი“ ტესტირებისა, რომელსაც წარმოადგენს „პისიარ“ ტექნოლოგია, ხელმისაწვდომი იყოს უფრო ფართოდ კლინიკებისა და მოსახლეობისთვის“, – განაცხადა ამირან გამყრელიძემ.

მისი თქმით, ამ საკითხთან დაკავშირებით სახელმწიფო მუშაობს, მიმდინარეობს მოლაპარაკებები.

„დაავადებათა კონტროლის ცენტრს გვაქვს მარაგი ტესტებისა, რომლითაც ვაწარმოებთ რთული მოლეკულური ტექნოლოგიებით კვლევას. არც ერთ შემთხვევაში ტესტზე უარი არ თქმულა იქ, სადაც საჭიროა და როცა ტესტირებისთვის მოთხოვნა ჯდება დღევანდელი შემთხვევის განსაზღვრის სტანდარტში. ყველას უტარდება ეს, მაგრამ გასაგებია, რომ მოსახლეობისგან უფრო მეტია მოთხოვნა და ამასთან დაკავშირებით ინტენსიურად ვმუშაობთ, რომ ქვეყანას გარდა „პისიარ“ ტექნოლოგოებისა, ჰქონდეს კიდევ ის ახალი, რომელიც ყოველდღიურად ჩნდება მსოფლიოში, ეს გახლავთ სწრაფი ტესტები, როგორც ანტიგენზე დამყარებული, ისე ანტისხეულზე. ამასთან დაკავშირებით სერიოზული მუშაობა მიდის, რომ სწრაფად იყოს ქვეყანაში რეგისტირებული და შემოტანილი აღნიშნული ტესტები“, – აღნიშნა დაავადებათა კონტროლის ცენტრის ხელმძღვანელმა.

როგორც მან განმარტა, ამ საკითხებზე კონსენსუსი იქნა მიღწეული დღეს შეხვერაზე დამსწრე ექსპერტებთან, მათ შორის რამდენიმე კერძო ლაბორატორიის წარმომადგენლებთან.

„ჯანდაცვის სამინისტრო ხელს შეუწყობს მათ ყოველმხრივ, რომ სწრაფი რეჟიმით მოხდეს ქვეყანაში იმპორტირება, რათა ისინი უფრო ხელმისაწვდომი გახდეს სამედიცინო ქსელში. ხაზს ვუსვამ, სამედიცინო ქსელში, რამეთუ ტესტის გაკეთება ბევრ ქვეყანაში, თუნდაც აშშ-ში, ექვემდებარება რეცეპტის გამოწერას, ანუ ტესტი ტარდება ექიმის რეცეპტის მიხედვით. ტესტი უნდა ჩაუტარდეს მას, ვისაც ექიმი ჩათვლის საჭიროდ, რომ უნდა გაიტესტოს.

ხაზს ვუსვამ, დღეს საქართველოში არ ყოფილა არც ერთი შემთხვევა, სადაც საჭირო იყო ტესტის ჩატარება და არ ჩატარებულიყო. ამის რესურსი ქვეყანას აქვს, მაგრამ ეს კიდევ უფრო უნდა გაფართოვდეს და ამაზე შეთახმება შედგა“, – განაცხადა ამირან გამყრელიძემ.

თაიმერი timer.ge
ავტ.: თაიმერი timer.ge მარტი 20, 2020 15:58

Google სტატისტიკა


3,408
ვიზიტორი
დღეში
Powered By Google Analytics