საქართველოს პრეზიდენტმა გიორგი მარგველაშვილმა ეროვნულ-დემოკრატიული ინსტიტუტის (NDI) წარმომადგენლებთან გამართა შეხვედრა, რომლებიც საქართველოში წინასაარჩევნო პერიოდის შესაფასებლად ჩამოვიდნენ.
შეხვედრისას დელეგაციის წევრებმა საქართველოს პრეზიდენტს აცნობეს, რომ 8 ოქტომბერს დანიშნულ საპარლამენტო არჩევნებზე საქართველოს საერთაშორისო სადამკვირვებლო დელეგაციები ესტუმრებიან.
მხარეებმა საქართველოში არსებული წინასაარჩევნო ვითარება განიხილეს.
პრეზიდენტის ადამინისტრაციის ინფორმაციით, ხაზგასმით აღინიშნა საერთაშორისო სადამკვირვებლო მისიების მნიშვნელობა, რათა არჩევნები საერთაშორისო პრინციპების სრული დაცვით, გამჭვირვალედ და სამართლიანად ჩატარდეს. საუბარი დღეს არსებულ პოლიტიკურ გარემოსაც შეეხო. სტუმრებმა აღნიშნეს, რომ მათი ვიზიტის მთავარი მიზანი, საერთაშორისო საზოგადოების მხარდაჭერის დემონსტრირებაა. მხარეებმა ასევე აღნიშნეს, რომ წინასაარჩევნო აგიტაციის დროს უმთავრესი ამოცანა, საარჩევნო პროცესებისადმი საზოგადოების ნდობის განმტკიცება უნდა იყოს.
„ჩვენს საერთაშორისო მეგობრებთან ჩვენ ვისაუბრეთ წინასაარჩევნო პერიოდში არსებულ სიტუაციაზე, კორცხელის ინციდენტზე. საუბარი გვქონდა ასევე, წინასაარჩევნო პერიოდში მედიაგარემოზე. დელეგაციის წევრები განსაკუთრებით დაინტერესდნენ პრეზიდენტის, როგორც სახელმწიფოს მეთაურისა და კონსტიტუციის გარანტის როლზე წინასაარჩევნო პერიოდში. პრეზიდენტმა მათ ამომწურავი პასუხი მიაწოდა თუ რა ტიპის კამპანიას გეგმავს და რა სახით აპირებს წინასაარჩევნო პროცესებში ჩაბმას, იმისათვის, რომ ამომრჩეველი მეტად იყოს მოტივირებული არჩევნებში მონაწილეობის მისაღებად“,- აღნიშნა ფიქრია ჩიხრაძემ.
ეროვნულ-დემოკრატიული ინსტიტუტის წარმომადგენლები წინასაარჩევნო ვიზიტის ფარგლებში ხელისუფლების წარმომადგენლებთან, საარჩევნო კანდიდატებთან, პოლიტიკურ პარტიებთან, სამოქალაქო და საერთაშორისო ორგანიზაციების წარმომადგენლებთან გამართავენ შეხვედრებს, რის საფუძველზეც წინასაარჩევნო გარემოსთან დაკავშირებით თავიანთ შეფასებას მოამზადებენ.
შეხვედრას ესწრებოდნენ საქართველოს პრეზიდენტის ადმინისტრაციის უფროსი გიორგი აბაშიშვილი, საქართველოს ეროვნული უშიშროების საბჭოს მდივანი ირინე იმერლიშვილი, საქართველოს პრეზიდენტის საგარეო ურთიერთობათა მდივანი თენგიზ ფხალაძე და საქართველოს პრეზიდენტის პოლიტიკური მრჩეველი ფიქრია ჩიხრაძე.
