ვანში, წალკაში, დმანისსა და ახმეტაში, სადაც საკრებულოების 4 მაჟორიტარი წევრის ასარჩევად შუალედური არჩევნები მიმდინარეობდა, საარჩევნო უბნები 20:00 საათზე დაიხურა.
ოთხივე საარჩევნო ოლქში ჯამში 7 საარჩევნო უბანი მოქმედებდა.
კენჭისყრა როგორც ელექტრონული, ისე ტრადიციული მოდელით ჩატარდა. ვანის უბანზე და წალკის 3 საარჩევნო უბანზე ელექტრონული ვერიფიკაციისა და ხმის მთვლელი აპარატები გამოიყენეს.
საარჩევნო ოლქებში ამომრჩეველთა საერთო რაოდენობა 2 225-ს შეადგენდა, ხოლო გადასატანი ყუთით სარგებლობის მოთხოვნით ადმინისტრაციას 50-მა მოქალაქემ მიმართა.
არჩევნებში 2 პოლიტიკური პარტიის მიერ წარდგენილი 7 კანდიდატი მონაწილეობდა. დმანისში, წალკასა და ვანში მაჟორიტარობისთვის „ქართული ოცნებისა“ და „ძლიერი საქართველო – ლელოს“ კანდიდატები იბრძოდნენ, ხოლო ახმეტაში მხოლოდ „ქართული ოცნების“ კანდიდატი იყო რეგისტრირებული.
ცენტრალურ საარჩევნო კომისიაში ბრიფინგი 21:00 საათზეა ჩანიშნული.
