ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, კაია კალასი სალომე ზურაბიშვილს 17 ოქტომბერს გაგზავნილ წერილზე პასუხობს.
ევროპარლამენტარის მიერ, საქართველოს მეხუთე პრეზიდენტისთვის გამოგზავნილ წერილს, “თაიმერი” უცვლელად გთავაზობთ:
“გმადლობთ თქვენი 17 ოქტომბრის წერილისთვის, რომელიც მე და ევროკავშირის საგარეო საქმეთა მინისტრებს მივმართეთ საქართველოში არსებული მდგომარეობის გაუარესების შესახებ.
ევროკავშირი და მისი წევრი სახელმწიფოები სრულად აცნობიერებენ საქართველოს წინაშე არსებულ გამოწვევებს და მათ გავლენას არა მხოლოდ თქვენი ქვეყნისთვის, არამედ რეგიონული სტაბილურობისთვისაც. ჩვენ ვიზიარებთ თქვენს შეშფოთებას ამჟამინდელი მთავრობის მიერ ძალაუფლების მუდმივი კონსოლიდაციის, ადამიანის უფლებების მუდმივი დარღვევების და კანონის უზენაესობისა და დემოკრატიული ინსტიტუტების ეროზიის შესახებ საქართველოში.
საქართველო კვლავ ჩვენი დღის წესრიგის ერთ-ერთ მთავარ საკითხად რჩება. 20 ოქტომბრის საგარეო საქმეთა საბჭომ განიხილა საქართველოში არსებული მდგომარეობის გაუარესება და ევროკავშირის შესაძლო შემდგომი ზომები მიმდინარე დემოკრატიული უკუქცევისა და ადამიანის უფლებების დარღვევების საპასუხოდ. 4 ნოემბერს ევროკომისიის ყოველწლიური ანგარიშის გამოქვეყნებამ საქართველოს შესახებ დაადასტურა, რომ საქართველოს ხელისუფლების მიერ განხორციელებული ქმედებები არ შეესაბამება ევროკავშირის მოლოდინებს ევროკავშირის კანდიდატი ქვეყნის მიმართ და რომ საქართველოს ევროკავშირში გაწევრიანების პროცესი ფაქტობრივად ჩიხში შევიდა.
ბოლო თვეების განმავლობაში, საქართველოს ხელისუფლებასთან პოლიტიკური კონტაქტები შემცირდა და ხელისუფლებისთვის გაწეული ფინანსური დახმარება შეჩერებულია. საქართველოს დემოკრატიული უკუქცევისა და ადამიანის უფლებების დარღვევისთვის პასუხისმგებელი პირების მიმართ პოტენციური სანქციების შესახებ დისკუსიები გრძელდება. 2025 წლის 27 იანვრიდან, ევროკავშირსა და საქართველოს შორის ვიზების გამარტივებული რეჟიმის შეთანხმების ნაწილობრივი შეჩერების გამო, ქართველ დიპლომატებსა და თანამდებობის პირებს ევროკავშირის ვიზებზე განაცხადის შეტანა მოეთხოვებათ. კომისია წლის ბოლომდე გამოაქვეყნებს ვიზის შეჩერების მექანიზმის ფარგლებში მერვე ანგარიშს, რომელშიც შეაფასებს, თუ როგორ შეასრულა საქართველოს ხელისუფლებამ წინა ანგარიშში მოცემული რეკომენდაციები და განსაზღვრავს შესაძლო შემდგომ ზომებს.
ამ კონტექსტში, ჩვენ კვლავ ერთგულნი ვრჩებით ხალხთაშორისი კონტაქტების, დამოუკიდებელი მედიის, სამოქალაქო საზოგადოების წარმომადგენლებისა და ახალგაზრდების მხარდაჭერის. ჩვენ გავაგრძელებთ დეზინფორმაციული ნარატივების აქტიურად წინააღმდეგობის გაწევას და მტკიცედ დავუდგებით ქართველ ხალხს და მათი ევროპული მომავლისკენ მისწრაფებებს”, – წერს კაია კალასი.
