საპროტესტო მსვლელობის მონაწილეებმა სანაპიროზე ევროკავშირის გიგანტური დროშა გაშალეს – პროტესტის რეჟიმში გადასული ადამიანების მთავარი გზავნილი ერთია. ყოველი მათგანი საქართველოს ევროპულ მომავალს, ხელახალი საპარლამენტო არჩევნების დანიშვნას და სინდისის პატიმრების გათავისუფლებას ითხოვს.
“საკუთარი ხალხის მტერი არ დარჩება დაუსჯელი; თავისუფლება რეჟიმის ტყვეებს; ჩვენი მომავალი ევროპაშია” – სკანდირებენ მოქალაქეები, რომლებიც ამ წუთებში მარშით ევროპის მოედნისკენ მიემართებიან.
თბილისის გარდა, საპროტესტო აქცია ბათუმშიც მიმდინარეობს. თავისუფალი მომავლისთვის მებრძოლი ადამიანები აპირებენ, რომ ევროპის მოედნიდან, თავდაპირველად, აჭარის უმაღლეს საბჭოსთან, შემდეგ კი საქალაქო სასამართლოსთან გადაინაცვლონ.
