საქართველოს მთავრობის ინფორმაციით, 2021-2024 წლებში, საოჯახო ტიპის პენიტენციური დაწესებულებები შეიქმნება, სადაც ერთსა და იმავე სასწავლო ინტერესების, მისწრაფებების მქონე რამდენიმე არასრულწლოვანი მოთავსდება და ისინი გათავისუფლებამდე ოჯახურ გარემოში იცხოვრებენ.
პენიტენციურ სისტემაში დაგეგმილ ღონისძიებებზე საუბარია სამთავრობო პროგრამაში, რომელიც პარლამენტს გუშინ წარედგინა. დოკუმენტში აღნიშნულია, რომ პენიტენციურ და პრობაციის სისტემებში გაძლიერდება რესოციალიზაციისა და რეაბილიტაციის პროგრამები.
ასევე გაუმჯობესდება მსჯავრდებულებისა და ყოფილი პატიმრებისთვის დასაქმების, პროფესიული სწავლების, განათლებისა და განტვირთვის შესაძლებლობები.
ამასთან, პროგრამაში ნათქვამია, დაგეგმილია ნომერ მე-18 სამკურნალო დაწესებულების ფსიქიატრიული განყოფილებისთვის სრულიად ახალი ინფრასტრუქტურის მოწყობა, რომელიც უზრუნველყოფილი იქნება შესაბამისი სასეირნო სივრცით.
