ჯანდაცვის სამინისტროს სამედიცინო საქმიანობის სახელმწიფო რეგულირების სააგენტო იწყებს „ჯეო-ჰოსპიტალის“ გურჯაანის სამედიცინო ცენტრში გარდაცვლილი პაციენტის საქმის შესწავლას.
უწყების ინფორმაციით, დღესვე იქნება გამოთხოვილი სამედიცინო დოკუმენტაცია და გატარდება შესაბამისი ღონისძიებები. საკითხის საბოლოო შესწავლისთვის, მნიშვნელოვანი იქნება სასამართლო-სამედიცინო ექსპერტიზის დასკვნა.
59 წლის ქალბატონი სამედიცინო დაწესებულებაში სასწრაფო დახმარების ბრიგადამ გულის პრობლემებით შეიყვანა. მას ოპერაცია უნდა ჩატარებოდა, თუმცა მეორე დღეს ექიმებმა ოჯახის წევრებს პაციენტის გარდაცვალების შესახებ შეატყობინეს.
ოჯახის მტკიცებით, გარდაცვლილის სხეულზე დალურჯებები, თავის არეში კი ჭრილობა ფიქსირდება, ამიტომ, მათი მოთხოვნით, ექსპერტიზა ჩატარდება.