„ევროპული საქართველოს“ დეპუტატი გიგა ბოკერია აცხადებს, რომ ამერიკულ სამხედრო ბაზასთან დაკავშირებით საქართველოს პრეზიდენტის, სალომე ზურაბიშვილის განცხადება ქვეყნისთვის საზიანო და მავნებლურია.
„ამ ადამიანისთვის საქართველოს პრეზიდენტის სტატუსის ქონა არის პროვოკაცია საქართველოს ეროვნული ინტერესების წინააღმდეგ. სხვა სიტყვები არ მყოფნის, რომ ეს აღვწერო. სამწუხაროდ, ამერიკული ბაზების ან რომელიმე ჩვენი მოკავშირის, თავისუფალი ქვეყნის ბაზების განლაგების საკითხი დღეს არ დგას ჩვენს ქვეყანაში. მაგრამ ჩვენ მივილტვით, რომ დაცული ვიყოთ ჩვენი მთავარი საფრთხისგან, რუსეთისგან. რატომ შეიძლება, რომ საქართველოს პრეზიდენტი იყოს ამის წინააღმდეგი. ან რატომ შეიძლება, რომ სუვერენული ქვეყნის პრეზიდენტი იძახდეს, რომ პროვოკაციაა, ქვეყნის სუვერენიტეტი იყოს დაცული მტრისგან მოკავშირე ქვეყნის შეიარაღებული ძალების განლაგებით, თუ შანსი მოგვეცა და იმედი გვაქვს, რომ მოგვეცემა. ეს ადამიანი არის სავსე ქვეყნისთვის საზიანო და მავნებლური შეხედულებებითა და იდეებით“, – განაცხადა გიგა ბოკერიამ.
საქართველოს პრეზიდენტმა, სალომე ზურაბიშვილმა „ამერიკის ხმასთან“ ინტერვიუში კითხვას, საქართველოში ამერიკული ბაზის აშენებასთან დაკავშირებით, ასე უპასუხა: „არ მგონია, ეს რეკომენდებული იყოს. ვფიქრობ, ეს ქვეყანა ისეთ ადგილზე მდებარეობს, სადაც უსაფრთხოება უნდა გავაძლიეროთ. არაა საჭირო გადავდგათ ნაბიჯები, რომლებიც შეიძლება პროვოკაციად იქნას აღქმული და ამასთან, არ მგონია შეერთებული შტატები აქ სამხედრო ბაზის ქონისთვის მზად იყო, რაც ყურადღებას მიიქცევს არა მხოლოდ რუსეთისგან, არამედ ტერორისტული მოძრაობებისგანაც, რომლებიც ჩვენს რეგიონში ძალიან აქტიური არიან. ჩვენს შორის არსებული ურთიერთგაგების საფუძველზე, უნდა გავაღრმაოთ და გავაფართოვოთ თანამშრომლობა და არ გადავდგათ ნაბიჯები, რომლებმაც შესაძლოა სხვების რეაქციის პროვოცირება გამოიწვიოს“.
