სალომე სამადაშვილი – გიორგი გახარია ცდილობს, ივანიშვილს შესთავაზოს პოლიტიკური პროექტი

გიორგი გახარია ცდილობს, ივანიშვილს შესთავაზოს პოლიტიკური პროექტი, ირაკლი კობახიძე კი, როგორც გაკოტრებული პარტიის თავმჯდომარე, იცავს საკუთარ პოზიციებს, – ამის შესახებ ფრაქცია „ლელოს“ წევრმა, სალომე სამადაშვილმა პარტია „ქართული ოცნების“ თავმჯდომარის, ირაკლი კობახიძის გუშინდელი განცხადებების კომენტირებისას აღნიშნა.

სამადაშვილის შეფასებით, ეს არის შეჯიბრი ბიძინა ივანიშვილის კარზე.

„რასაც ჩვენ ვხედავთ, ეს არის უბრალოდ შეჯიბრი ბიძინა ივანიშვილის კარზე. გახარია უბრალოდ ფიქრობს, რომ ივანიშვილს შესთავაზოს პოლიტიკური პროექტი, რომელიც შეიძლება, მისთვის უფრო საინტერესო იყოს, ვიდრე „ქართული ოცნება“. ირაკლი კობახიძე, როგორც ამ გაკოტრებული პარტიის თავმჯდომარე, იცავს საკუთარ პოზიციებს. საბოლოო ჯამში გადაწყვეტილების მიმღები, ძალაუფლების წყარო და ყველანაირი პრობლემის მიზეზი რჩება ისევ და ისევ ივანიშვილის არაფორმალური მმართველობა. ამიტომ ივანიშვილის არანაირი პროექტი, იქნება ეს კობახიძე თუ სხვა, ქართველი ხალხისთვის სატყუარა არ იქნება. ხელისუფლება უნდა შევცვალოთ აუცილებლად დემოკრატიული ოპოზიციის კოალიციურ ხელისუფლებაში მოყვანის გზით, რაც არის ერთადერთი გზა იმისთვის, რომ ჩვენ რეალურად დავამარცხოთ ოლიგარქიული რეჟიმი ჩვენს ქვეყანაში“, – განაცხადა სამადაშვილმა.

კითხვაზე, უნდა დაიწყოს თუ არა სისხლის სამართლებრივი გამოძიება 20 ივნისის საქმეზე გიორგი გახარიას წინააღმდეგ, სამადაშვილმა უპასუხა: „გააჩნია, ბიძინა ივანიშვილი რა სანქციას გასცემს, იმის მიხედვით გადაწყდება, დაიწყება თუ არა სისხლის სამართლებრივი დევნა გახარიას წინააღმდეგ“.

banner
წინა სტატიაშისაქართველოში ბოლო 24 საათში კორონავირუსით 23 პაციენტი გარდაიცვალა
შემდეგი სტატიასაქართველოში კორონავირუსის 1 092 ახალი შემთხვევა გამოვლინდა