საკონსტიტუციო ცვლილებების მიღება „ქართული ოცნებისთვის” ტესტია, რამდენად აპირებენ დეპოლარიზაციის პროცესის დაწყებას და რამდენად მისცემენ პატარა პარტიებს პოლიტიკაში შემოსვლის საშუალებას – ბეჟაშვილი

თაიმერი

ევროკავშირის 12-პუნქტიანი რეკომენდაციების პირველი პუნქტი – დეპოლარიზაცია იმას გულისხმობს, რომ პოლიტიკურ სპექტრში მთავარი მარტო ორი პოლიტიკური ძალა – „ქართული ოცნება“ და „ნაციონალური მოძრაობა” არ უნდა იყოს და პოლიტიკაში შემოსვლის საშუალება სხვა პარტიებსაც უნდა მიეცეს, – ამის შესახებ ჟურნალისტებთან ფრაქცია “ნაციონალური მოძრაობის” წევრმა ლევან ბეჟაშვილმა განაცხადა.

ბეჟაშვილის თქმით, ამის ერთადერთი გარანტია საარჩევნო ბარიერის 2%-მდე დაწევა და საარჩევნო ბლოკების დაშვებაა, რაც თავისთავად საკონსტიტუციო ცვლილებების განხორციელებას გულისხმობს.

„საკონსტიტუციო ცვლილებების მიღება „ქართული ოცნებისთვის” ტესტია, რამდენად აპირებენ დეპოლარიზაციის პროცესის დაწყებას და რამდენად მისცემენ პატარა პარტიებს პოლიტიკაში შემოსვლის საშუალებას – იქნება ეს ბარიერის 2%-მდე დაწევა თუ საარჩევნო ბლოკების აკრძალვის გაუქმება.

„ქართულმა ოცნებამ” საკუთარ ხალხს და ევროკავშირს ულტიმატუმები კი არ უნდა წაუყენოს, არამედ უნდა იმოქმედოს როგორც პასუხისმგებლიანმა მთავრობამ, რომელსაც სამწუხაროდ, წილად ხვდა ხელისუფლებაში ყოფნა. რაც შეიძლება დროულად უნდა მივიღოთ საკონსტიტუციო ცვლილებები, რათა დეპოლარიზაციის პროცესი დაიწყოს და უზრუნველვყოთ ევროკავშირის 12 -პუნქტიანი გეგმის შესრულება”, – განაცხადა ლევან ბეჟაშვილმა.

წინა სტატიაშიუკრაინაში აღმოაჩინეს სექს-ტრეფიკინგის ქსელი, რომელიც ლტოლვილ ქალებზე “ნადირობს” და მოტყუებით თურქეთში გზავნის
შემდეგი სტატიაელჩი ყაველაშვილის წერილზე: სავსე იყო ტყუილით, შეთქმულების თეორიით, ბოლომდე ვერც წავიკითხე