სახალხო დამცველმა, ლევან იოსელიანმა „პალიტრანიუსის“ გადაცემაში 2024 წლის ნოემბერ-დეკემბრის აქციების დაშლის დროს დაშავებულ მომიტინგეებთან დაკავშირებით ისაუბრა.
მისი თქმით, აქციის მონაწილეები ვინც მოინახულა, ჰქონდათ საკმაოდ სერიოზული დაზიანებები, იყო ძალიან მძიმე შემთხვევები, ფაქტია, რომ დღემდე არავინ არის დასჯილი. აღნიშნული საკითხი სახალხო დამცველის 2025 წლის ანგარიშშიც მოხვდა, რომელიც დღეს პარლამენტს წარედგინა.
როგორც იოსელიანმა აღნიშნა, მსგავსი ძალადობრივი ქმედებები ვერ უძლებს დროს. მისი განმარტებით, როდესაც ხელისუფლება შეიცვლება, ადამიანები აუცილებლად დაისჯებიან, რომლებმაც აქციების დაშლისას სამსახურებრივ უფლებამოსილებას გადაამეტეს.
„ამ საკითხზე შარშანდელ ანგარიშშიც ძალიან ბევრი ეწერა. შარშანაც პარლამენტში ძალიან დიდი დრო დავუთმე სწორედ ამ საკითხზე საუბარს, 2024 წელსაც იყო დაკავებები და მაშინაც არასათანადო მოპყრობას ჰქონდა ადგილი.
სახალხო დამცველის აპარატის თანამშრომლებმა 500-ზე მეტი ადამიანი მოინახულა, ამ 500 ადამიანიდან 100-ზე მეტი პირადად მე მოვინახულე და არ მჭირდება ჩანაწერი ან დამატებითი მონაყოლი იმისთვის, რომ ამ ადამიანების შესახებ ამბავი ვიცოდე, ჩემი თვალით ვნახე ისინი საავადმყოფოებშიც, დაკავების იზოლატორებშიც.
ყველაზე მძიმე შემთხვევები საავადმყოფოებში იყო, განსაკუთრებით ინგოროყვას კლინიკაში, ძირითადად იქ მიჰყავდათ ხოლმე დაშავებულები. ნანახი მყავს ეს ადამიანები, მათი დაზიანებები იყო ძალიან მაღალი ხარისხის და ვინც ეს ადამიანები დააზიანა, არცერთი პირი არ არის პასუხისგებაში მიცემული.
ერთის მხრივ, დაკავებულები არიან აქციის მონაწილეები, გასაგებია, რომ ვიღაცამ შეიძლება რაღაც ჩაიდინა, მაგრამ მეორეს მხრივ, ძალოვანი სტრუქტურების წარმომადგენლები პასუხისგებაში მიცემული არ არიან.
მე ვინც მოვინახულე, მათ მსუბუქი დაზიანებები არ ჰქონდათ, ჰქონდათ საკმაოდ სერიოზული დაზიანებები. რამდენიმე ადამიანი რეანიმაციულ განყოფილებაშიც იმყოფებოდა. იყო ძალიან მძიმე შემთხვევები. ისინი, ვინც უბრალოდ არასათანადო მოპყრობაზე საუბრობდნენ და ძალის გადამეტებაზე, ისინი საავადმყოფოში არც მოხვედრილან, ძირითადად იზოლატორებში იყვნენ და იქ მიყვებოდნენ ამ ყველაფერს.
იმ პერიოდში ძალიან აქტიურად მუშაობდა სპეციალური საგამოძიებო სამსახური, რომელიც ამ საქმეებს იკვლევდა, გამოძიებას აწარმოებდა. რამდენადაც ვიცი, 100-მდე საქმეზე დაიწყო გამოძიება. იდენტიფიცირება რომ ვერ ხერხდება, ვისაც ნიღაბი უკეთია, იმაზე შეიძლება იყოს ეს არგუმენტი, თუმცა გამოძიება იმისთვის არსებობს, რომ ყველას იდენტიფიცირება მოახდინოს. იქ ასევე იყო შემთხვევები, ვისაც არ ეკეთა ნიღაბი და მათ იდენტიფიცირებას საერთოდ არაფერი არ სჭირდება გარდა პოლიტიკური ნებისა. ვიღაცის იდენტიფიცირება შეიძლება იყოს პრობლემა, მაგრამ ვიღაცების იდენტიფიცირება საერთოდ არ არის პრობლემა.
მთავარი არის ის, რომ ადამიანებმა როდესაც გადაამეტეს სამსახურებრივ უფლებამოსილებას და ჩაიდინეს კონკრეტული დანაშაული, მათ მიმართ მართლმსაჯულება განხორციელდეს და არ იყოს მხოლოდ ცალმხრივი იმიტომ, რომ ეს საზოგადოებაში ძალიან დიდ უსამართლობის განცდას იწვევს. არ შეიძლება, ერთ მხარეს გამოიყენო სასჯელი და მეორე მხარეს საერთოდ არცერთი ნაბიჯი არ იქნას გადადგმული.
ასეთი რაღაცები ვერ უძლებს დროის გამოცდას. გავა დრო, აუცილებლად მოვა სხვა ხელისუფლება და ამ ადამიანებს მაინც მოუწევთ პასუხისგება.
ფაქტია, რომ დღემდე არავინ არის დასჯილი. ეს პროცესი უკვე წელიწადზე მეტია, გაჭედილია და მე ვერ ვხედავ, რომ თუნდაც პოლიტიკურ დონეზე, იგივე მმართველი პარტიიდან ვიღაც ამ საკითხს აყენებდეს და ამის გამოძიებას ითხოვდეს“, – განაცხადა იოსელიანმა.
