აჭარაში არჩევნები მშვიდ ვითარებაში მიმდინარეობს, – ამის შესახებ ახალგაზრდა იურისტთა ასოციაციის აჭარის ფილიალის თავმჯდომარემ გიორგი ხიმშიაშვილმა განაცხადა.
მისი თქმით, იმ უბნებზე, სადაც საია-ს დამკვირვებლები იმყოფებიან, არჩევნები, საერთო ჯამში, მშვიდ ვითარებაში მიმდინარეობს, თუმცა ამ დროისთვის სამი საჩივარი უკვე დაწერილი აქვთ.
„ორი მათგანი პროცედურულ დარღვევებს ეხება, ერთი კი დამკვირვებლის უფლების შეზღუდვას ქობულეთის მე-16 უბანზე, სადაც ჩვენი დამკვირვებელი ერთი საათის განმავლობაში არ დაუშვეს, თუმცა ეს დარღვევები ვერ მოახდენს არსებით გავლენას კენჭისყრის პროცესზე“, – განაცხადა გიორგი ხიმშიაშვილმა.
საია-ს წარმომადგენლის განცხადებით, საარჩევნო უბნების ტერიტორიაზე შეინიშნება პარტიული აქტივისტების მობილიზება, რომლებიც ორგანიზებას უწევენ ამომრჩეველთა მობილიზებას. მისი შეფასებით, ეს არ არის კანონდარღვევა, თუმცა, შესაძლოა, ნეგატიურად იმოქმედოს ამომრჩევლის გადაწყვეტილებაზე.
