საგარეო უწყება ოკუპირებულ ტერიტორიებზე რუსეთის საპრეზიდენტო არჩევნებს გმობს

საგარეო საქმეთა სამინისტრო გმობს რუსეთის ფედერაციის საპრეზიდენტო არჩევნების ჩატარებას საქართველოს ოკუპირებულ ტერიტორიებზე, სადაც 33 საარჩევნო უბანი უკანონოდ იქნა გახსნილი, – ამის შესახებ აღნიშნულია სამინისტროს მიერ გავრცელებულ განცხადებაში.
საგარეო უწყების ცნობით, აღნიშნული წარმოადგენს საქართველოს აფხაზეთისა და ცხინვალის რეგიონების ოკუპაციის კიდევ ერთ ნათელ მაგალითს და მათი ფაქტობრივი ანექსიისკენ გადადგმულ მორიგ უკანონო ნაბიჯს.
„საქართველოს ოკუპირებული ტერიტორიებზე რუსეთის საპარლამენტო თუ საპრეზიდენტო არჩევნები ტარდება იმ პირობებში, როცა აფხაზეთისა და ცხინვალის რეგიონებში დარჩენილი მოსახლეობა 2000-იანი წლებიდან მოყოლებული მასობრივად გახდა მოსკოვის უკანონო, იძულებითი პასპორტიზაციის მსხვერპლი, ხოლო ეთნიკური წმენდის შედეგად გამოდევნილი ასობით ათასი იძულებით გადაადგილებული პირი და ლტოლვილი კვლავ მოკლებულია საკუთარ სახლებში დაბრუნების უფლებას.
მსგავსი ქმედებებით რუსეთის ფედერაცია სრულად უგულებელყოფს გაეროს წესდებას, ჰელსინკის დასკვნით აქტს და უხეშად არღვევს საერთაშორისო სამართლის ისეთ ფუნდამენტურ ნორმებსა და პრინციპებს, როგორიცაა: სუვერენიტეტი, ტერიტორიული მთლიანობა, საერთაშორისოდ აღიარებული საზღვრების ურღვევობა და შიდა საქმეებში ჩაურევლობა“,- აღნიშნულია საგარეო უწყების მიერ გავრცელებულ განცხადებაში.
საგარეო საქმეთა სამინისტრო მიმართავს საერთაშორისო თანამეგობრობას, „სათანადო შეფასება მისცეს რუსეთის უკანონო ქმედებებს საქართველოს ოკუპირებულ რეგიონებში, რომლებიც ძირს უთხრის სამართალსა და წესებზე დაფუძნებული საერთაშორისო წესრიგს“.

banner
წინა სტატიაშიოკუპირებული გაგრის ცენტრალურ საავადმყოფოში ახალგაზრდა კაცი მოკლეს
შემდეგი სტატიაპოლონეთში ავტოსაგზაო შემთხვევას საქართველოს ორი მოქალაქე ემსხვერპლა, ხუთი კი სხეულის დაზიანებებით ადგილობრივ საავადმყოფოშია მოთავსებული