სადეზინფექციო ხსნარებით დიდუბის რაიონის რამდენიმე ქუჩა დამუშავდა

კორონავირუსის გავრცელების პრევენციის მიზნით, სადეზინფექციო საშუალებებით დედაქალაქის ქუჩების დამუშავების პროცესი გრძელდება. გზის მორეცხვის სამუშაოები ამჯერად, დიდუბის რაიონში, რობაქიძის გამზირზე ჩატარდა.

სადეზინფექციო ხსნარებით ასევე, დამუშავდა გოგიბერიძის, პაიჭაძის, ახმეტელის, ლუბლიანასა და მიქელაძის ქუჩები.

სამუშაო პროცესს დედაქალაქის მერი კახა კალაძე „თბილსერვის ჯგუფის“ ხელმძღვანელ რომეო მიქაუტაძესთან ერთად გაეცნო.

„მთელი ქალაქის მასშტაბით, სადეზინფექციო ხსნარებით დაახლოებით, 70 ქუჩა დამუშავდება. ეს ძირითადად ის ქუჩებია, რომელიც ხალხმრავლობით გამოირჩევა. გზის სავალი ნაწილის გარდა, მუშავდება ტროტუარები, ველობილიკები და ნარჩენების კონტეინერები. ეს არის პრევენციული ტიპის ღონისძიება, რომელიც კორონავირუსის წინააღმდეგ ბრძოლაში მნიშვნელოვანია“, – განაცხადა კახა კალაძემ.

სადეზინფექციო სამუშაოებს შპს „თბილსერვის ჯგუფი“ და შინაგან საქმეთა სამინისტროს საგანგებო სიტუაციების მართვის სამსახური ერთობლივად, სპეციალური ტექნიკის გამოყენებით ახორციელებენ.

უწყებათაშორისი საკოორდინაციო საბჭოს რეკომენდაციით, სპეციალური სადეზინფექციო ხსნარებით დედაქალაქის ქუჩები ეტაპობრივად მუშავდება. სპეციალური ხსნარით ირეცხება, როგორც გზის სავალი ნაწილი, ასევე, ტროტუარები და ველობილიკები. ღონისძიებების ფარგლებში, დეზინფექცია ასევე, უტარდება საზოგადოებრივი ტრანსპორტის გაჩერებებსა და ნაგავშემკრებ კონტეინერებს.

სადეზინფექციო სამუშაოებს თბილისის მერთან ერთად, დიდუბის რაიონის გამგებელი ირმა ზავრადაშვილი და პარლამენტის დეპუტატი ილია წულაია გაეცნენ.

banner
წინა სტატიაშიბექა ლილუაშვილი – ჩვენი ხელისუფლების მიერ დროულად გადადგმული ნაბიჯები იყო, იმ წარმატების საფუძველი, რომელიც დღეს გვაქვს, როგორც ეპიდემიოლოგიური, ისე ეკონომიკური თვალსაზრისით
შემდეგი სტატიაბექა ლილუაშვილი ოპონენტების შეფასებაზე სოციალურ პაკეტთან დაკავშირებით – თუ ეს პაკეტი იმდენად მისაღებია მოქალაქეებისთვის, რომ წყვეტს არჩევნების ბედს, ჩვენი მთავარი ამოცანა, შეგვეთავაზებინა ქმედითი პაკეტი მოსახლეობისთვის, მიღწეულია