საბერძნეთის სამხედრო-საჰაერო ძალებმა ქვეყნის ეროვნულ საჰაერო სივრცეში შეჭრილ თურქულ უპილოტო საფრენ აპარატს გზა გადაუჭრეს. ამის შესახებ ინფორმაციას ბერძნული მედია ავრცელებს.
ინციდენტი 28 აგვისტოს დილით, კუნძულებს — სამოფრაკიასა და ლემნოსს შორის არსებულ საზღვაო ზონაში მოხდა. თურქული დრონი ალექსანდროპოლისის აეროპორტის ასაფრენ-დასაფრენ ბილიკს სწორედ იმ დროს მიუახლოვდა, როდესაც ავიაკომპანია Aegean-ის სამგზავრო თვითმფრინავი აფრენისთვის ემზადებოდა.
საფრენი ობიექტის იდენტიფიცირებისა და მისთვის გზის გადასაჭრელად საბერძნეთმა ჰაერში ორი F-16 ტიპის ავიაგამანადგურებელი ოპერატიულად აწია.
„სამოქალაქო ავიაციის სამსახურისა და ბერძნული ავიაგამანადგურებლების კოორდინირებული თანამშრომლობის წყალობით, მათ შეძლეს დრონის მოშორება სამგზავრო ფრენის უსაფრთხოებისთვის ზიანის მიყენების გარეშე“, — იუწყება ბერძნული მედია.
უსაფრთხოების ზომებიდან გამომდინარე, Aegean-ის სამგზავრო თვითმფრინავმა მითითება მიიღო, რომ ისარგებლა ალტერნატიული ასაფრენი ზოლით და დაბალი კურსი შეენარჩუნებინა მანამ, სანამ პოტენციური საფრთხის არეალს არ დაშორდებოდა.
