„ტოლერანტობის საერთაშორისო დღე, ერთ-ერთი გამორჩეული დღეა მთელი კაცობრიობისთვის, რომელიც განსაკუთრებით გვახსენებს რომ რასის, რელიგიური აღმსარებლობის თუ პოლიტიკური შეხედულებების,გენდერული თუ სხვა სახის განსხვავებულობის მიუხედავად, ყველას ზოგადსაკაცობრიო ჰუმანური ფასეულობები გვაერთიანებს და ამ ფასეულობების იგნორირებით, ადამიანები ვურთულებთ ერთმანეთს არსებობას.
აფხაზეთის ავტონომიური რესპუბლიკის მთავრობა უერთდება მსოფლიო თანამეგობრობის მცდელობას, რომ ყოველი ჩვენთაგანის განსხვავებულობა ვაქციოთ ერთიანი საზოგადოების ძლიერ მხარედ და არა გამყოფ ფაქტორად. ჩვენი საზოგადოების მრავალსაუკუნოვანი ტოლერანტობის გამოცდილება, გვაძლევს რწმენას, რომ ღირსეულად გავუმკლავდებით ამგამოწვევასაც და უზრუნველვყოფთ უნიკალური იდენტობის შენარჩუნებას“, -განაცხადა რუსლან აბაშიძემ.
