რუსლან აბაშიძე სამოქალაქო ინტეგრაციის აკადემიის კურსდამთავრებულების დაჯილდოებას დაესწრო

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე სამოქალაქო ინტეგრაციის აკადემია აფხაზეთიდან დევნილი ბავშვებისთვის პროექტში მონაწილეების დაჯილდოებას დაესწრო.

ღონისძიებაზე მისასალმებელი სიტყვით გამოვიდნენ მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი ნანა გაბელია, რომლებმაც ახალგაზრდებს კურსის წარმატებით დასრულება მიულოცეს, სერტიფიკატები გადასცეს და შემდგომი წარმატებები უსურვეს.

კონკურსის შედეგად შერჩეულ, აფხაზეთიდან დევნილ 20 ახალგაზრდას სამოქალაქო ინტეგრაციის მიმართულებით ხუთდღიანი სასწავლო კურსი ჩაუტარდა. მონაწილეებს საქართველოს ახალგაზრდობის წარმომადგენელმა გაეროში ნინო გოგოხიამ სხვადასხვა საერთაშორისო პროექტებში მიღებული გამოცდილება გაუზიარა. პროგრამის დასასრულს ახალგაზრდებმა კურსის ფარგლებში მომზადებული პრეზენტაციები წარადგინეს.

პროექტი იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით განხორციელდა და მისი მიზანია ახალგაზრდებში სამოქალაქო ინტეგრაციის საკითხებზე ცოდნის მიღება, აქტიურ მოქალაქეებად ჩამოყალიბების ხელშეწყობა და ახალი უნარების განვითარება.

წინა სტატიაშიმელია – თუ ვინმე კონსტიტუციას ფეხქვეშ თელავს, კანონს არღვევს ყოველდღე, ყოველწუთს და ყოველწამს, ეს არის რეჟიმი
შემდეგი სტატიასაქართველოს მთავრობა – ევროკავშირმა საქართველოში გაცემული კოვიდ-სერთიფიკატი აღიარა