რუსეთმა თურქეთისგან ავანსის სახით გარკვეული რაოდენობის თანხა მიიღო, რაც უკავშირდება ამ უკანასკნელის მიერ საზენიტო-სარაკეტო კომლექსის С-400 -ის შესყიდვას. ამის შესახებ 29 სექტემბერს განაცხადა რუსეთის პრეზინდეტის თანაშემწემ ვლადიმერ კოჟინმა. “დიახ, მივიღეთ. მიწოდების თარიღს ჯერ ვერ გეტყვით”, – აღნიშნა კოჟინმა.
მისი თქმით, თურქეთს სურს, რომ მიწოდება დაიწყოს 2019 წლამდე, მაგრამ ეს საკითხი ჯერ არ ყოფილა განხილული.
ცოტა ხნით ადრე, თურქეთის სამხედრო წარმოების წარმომადგენელმა ისმაილ დემირმა განაცხადა, რომ С-400 -ის მიწოდება 2 წელიწადში დაიწყება.
28 სექტემბერს ანკარაში გამართულ შეხვედრაზე თურქეთის და რუსეთის პრეზიდენტებმა მიიღეს ერთობლივი გადაწყვეტილება სირიის პროვინცია იდლიბში დეესკალაციის ზონის შექმნის შესახებ. მათ, აგრეთვე, ისაუბრეს ეკონომიკური თანამშრომლობის გაღრმავების თაობაზე.
