აშშ-ს სარაკეტო ავიადარტყმების დასრულებისთანავე ტერორისტული დაჯგუფებები “ისლამური სახელმწიფო” და “ჯაბხატ ან-ნუსრა” სირიის სამთავრობო ჯარების შეტევაზე გადავიდნენ – რუსეთის თავდაცვის სამინისტრომ გაავრცელა.
სირიის პრეზიდენტმა ბაშარ ასადმა, თავის მხრივ განაცხადა, რომ დამომბევით აშშ ტერორისტულ დაჯგუფებებს ეხმარება.
რუსეთში გამართულ უშიშროების საბჭოს საგანგებო სხდომაზე, რომელიც პრეზიდენტმა პუტინმა აშშ-ს ავიადარტყმების გამო სპეციალურად მოიწვია, მან ხაზგასმით აღნიშნა, რომ აშშ-მ დღეს დილით სირიის წინააღმდეგ აგრესია განახორციელა.
შეგახსენებთ, რომ დღეს დილით აშშ-მ 59 ფრთიანი რაკეტა “ტომაგავკი” დაარტყა ცენტრალურ სირიაში სამხედრო აეროდრომს. აშშ-ს პრეზიდენტმა დონალდ ტრამპმა სარაკეტო დარტყმებს, სირიის პროვინცია იდლიბში სამშაბათს სირიის სამთავრობო ძალების მიერ გამოყენებული გაზის გამო, შურისძიება უწოდა.
ავიადარტყმების შედეგად 10 სამხედრო მოსამსახურე დაიღუპა – სირიის არმიამ გაავრცელა. ამასთანავე, სირიის სამთავრობო საინფორმაციო სააგენტო “სანა” იტყობინება, რომ ავიადარტყმებს 9 მშვიდობიანი მოქალაქე ემსხვერპლა, მათ შორის ოთხი ბავშვი, შვიდმა კი დაზიანებები მიიღო. სააგენტოს ინფორმაციით, სამხედრო ბაზის რაიონში ბევრი საცხოვრებელი სახლი სერიოზულად დაზიანდა.
