უკრაინის დამცველები სუმის ოლქში რუს დამპყრობლებს საკუთარი გეგმების განხორციელებაში ხელს უშლიან. ამის შესახებ უკრაინის პრეზიდენტმა ვოლოდიმირ ზელენსკიმ უმაღლესი მთავარსარდლის შტაბის სხდომის შემდეგ უკრაინელებისადმი საღამოს ვიდეომიმართვაში განაცხადა.
„დღეს შტაბ-ბინაში ფრონტის შესახებ ძალიან დეტალური ანგარიში იყო წარდგენილი. განსაკუთრებული ყურადღება – სუმის ოლქი, სასაზღვრო ზონაში მიმდინარე მოქმედებები. მადლობელი ვარ ჩვენი დანაყოფების მათი სიმტკიცისთვის. იქ მყოფ რუსებს განსხვავებული გეგმები, განზრახვები ჰქონდათ – აბსოლუტურად გიჟური, როგორც ყოველთვის. ჩვენ ვაკავებთ და ვანადგურებთ ამ მკვლელებს, ვიცავთ ჩვენს სუმის ოლქს“, – ხაზგასმით აღნიშნა ზელენსკიმ.
მისივე თქმით, იარაღის მიწოდებასთან დაკავშირებული ყველა შეთანხმება ძალიან დეტალურად განიხილეს: კონტრაქტები, ფინანსები, პარტნიორების კონკრეტული ვალდებულებები.
„წლევანდელი მხარდაჭერის მოცულობა ყველაზე დიდია სრულმასშტაბიანი ომის ყველა წელთან შედარებით. მე დავავალე, კიდევ უფრო გავზარდოთ მუშაობა პარტნიორებთან ჩვენს წარმოებაში – ჩვენს იარაღში ინვესტიციების მიზნით. ჩვენ ასევე ვამზადებთ ახალ პლატფორმას ასეთი წარმოებისთვის. ეს არის გრძელვადიანი, სისტემური სამუშაო და მინდა მადლობა გადავუხადო თითოეულ ქვეყანას, რომელიც უკვე მონაწილეობს“, – აღნიშნა პრეზიდენტმა.
გარდა ამისა, როგორც სახელმწიფოს მეთაურმა განაცხადა, ნატოში პარტნიორებთან ერთად მომავალი კვირისთვის ახალი შეთანხმებები მზადდება.
„კერძოდ, წარმოებაში ინვესტიციებთან დაკავშირებით. ეს, პირველ რიგში, ტექნოლოგიებია, ეს, პირველ რიგში, დრონები და საარტილერიო ჭურვებია. ცალკე ვმუშაობთ დრონების ჩამჭრელ აპარატებზე, რამაც უნდა გაზარდოს „შაჰედებისგან“ დაცვა. ჩვენი რამდენიმე ადგილობრივი საწარმო და შესაბამისად, დრონების ტიპები შედეგებს იძლევა. ჩვენს პარტნიორებთან ვმუშაობთ უფრო ხელშესახები დაფინანსების მისაღებად და დარწმუნებული ვარ, ეს მოხდება. ჩამჭრელების წარმოების მოცულობა უკვე იზრდება“, – განაცხადა ზელენსკიმ.
ცალკე, პრეზიდენტმა გუნდს დაავალა, მოემზადებინათ დამატებითი შესაძლებლობები თანამშრომლობისთვის, „მსურველთა კოალიციის“ ფარგლებში.
„რაც გააძლიერებს ჩვენს საერთო უსაფრთხოების არქიტექტურას. რუსებმა დღეს კიდევ ერთხელ განაცხადეს საკმაოდ ღიად და აბსოლუტურად ცინიკურად, რომ მათ „არ სურთ“ ცეცხლის შეწყვეტაზე დათანხმება. რუსეთს ბრძოლა სურს. ის სხვა რამით იმუქრება. ეს ნიშნავს, რომ მათ ჯერ არ აწუხებთ მსოფლიოს მიერ განხორციელებული ზეწოლა, ან ძალიან ცდილობენ, რომ ასე წარმოაჩინონ. რუსეთის ეკონომიკა ისედაც უარესდება. მოდით, ამ პროცესს კიდევ უფრო მეტად დავუჭიროთ მხარი. აიათოლა პუტინს ირანში თავისი მეგობრებისგან შეუძლია დაინახოს, თუ რა შედეგი მოაქვს ასეთ რეჟიმებს და რა ჩამორჩენილობამდე მიჰყავთ მათ თავიანთი ქვეყანა. უსაფრთხოების აღსადგენად ჩვენი მხრიდან მეტი გადაწყვეტილება იქნება მიღებული“, – ხაზგასმით აღნიშნა ზელენსკიმ.
