რუმინეთის საზღვაო ძალებმა შავ ზღვაში, Neptun Deep-ის გაზის პლატფორმის სიახლოვეს, ასაფეთქებელი ნივთიერებით დატვირთული საზღვაო დრონი გაანადგურეს. მომხდარს ევროკომისიის პრეზიდენტი ურსულა ფონ დერ ლეიენი სოციალურ ქსელ X-ზე გამოეხმაურა.
ევროკომისიის პრეზიდენტის შეფასებით, აღნიშნული ინციდენტი ჰიბრიდული ომის ნაწილია, რომლის მიზანიც ევროკავშირის წევრ ქვეყნებს შორის განხეთქილების ჩამოგდება და მოქალაქეებში დაუცველობის განცდის გაჩენაა.
„მიმდინარეობს მუქარების ესკალაციური კამპანია, რომელიც აშფოთებს ჩვენს მოქალაქეებს და მიზნად ისახავს ჩვენი კავშირის გახლეჩას. ეს არის ჰიბრიდული ომი. ჩვენი კავშირის დამფუძნებლური მისია მშვიდობის შენარჩუნებაა. დღეს ეს ასევე ნიშნავს პროვოკაციებისა და აგრესიის შეკავების შესაძლებლობის ქონას“, — წერს ურსულა ფონ დერ ლეიენი.
ფონ დერ ლეიენმა ხაზი გაუსვა ევროკავშირის უსაფრთხოების ახალ ინიციატივებს და აღნიშნა, რომ დღის წესრიგი „Readiness 2030“ 800 მილიარდ ევრომდე თანხის მობილიზებას ითვალისწინებს.
მისი თქმით, ევროპული დრონების თავდაცვის ინიციატივისა და აღმოსავლეთ ფლანგის მეთვალყურეობის გაძლიერებით, ევროკავშირი სამხედრო წარმოებას ზრდის, რათა წევრმა სახელმწიფოებმა წარმოქმნილ საფრთხეებს სწრაფად და ერთიანად უპასუხონ.
